काठमाडौं– प्रमुख प्रतिपक्षी दल नेकपा माओवादी केन्द्रले निजामती सेवा विधेयकमाथि भएको छेडखानीको विषयलाई लिएर सभापति रामहरि खतिवडाले नै राजीनामा दिने विषय व्यक्तिगत भएको बताएको छ ।

प्रतिनिधिसभाअन्तर्गतको राज्यव्यवस्था तथा सुशासन समितिको बुधबारको बैठकमा माओवादीका प्रमुख सचेतक हितराज पाण्डेले नैतिकता प्रदर्शन गर्ने विषय सभापति खतिवडाको व्यक्तिगत भएको बताएका हुन् । 

‘नैतिकताको विषय व्यक्तिगत उहाँले नै प्रदर्शन गर्ने हो । विश्वास, माया, आदर भन्ने मागेर पाइने होइन,’ उनले भने, ‘कुलिङ पिरियड राख्नुपर्छ भनेर सबैभन्दा बढी बोल्ने उहाँ नै हो । फेरि हस्ताक्षर उहाँकै छ ।’

पाण्डेले विधेयकमाथि भएको छेडखानीमा संलग्न सबैमाथि कारबाहीको माग पनि गरे । ‘कुलिङ अफ पिरियड’को व्यवस्था हटाउने भूमिका रहेका व्यक्तिहरूलाई कारबाहीका लागि उच्चस्तरीय संसदीय छानबिन समिति बनाउनु पर्ने माओवादीको माग छ । 

‘सानोतिनो षड्यन्त्र भएको होइन, संसद्लाई बदनाम गर्ने गरी ठूलो षड्यन्त्र भएको छ । यसलाई यसै छाड्न हुँदैन,’ पाण्डेले भने, ‘उच्चस्तरीय संसदीय छानबिन समिति बनाउनु पर्‍यो । सभापतिदेखि सबैमाथि छानबिन गर्नु पर्‍यो र दोषीमाथि कडा कारबाही गर्नुपर्‍यो ।’