काठमाडौं– प्रधानमन्त्री तथा नेकपा एमालेका अध्यक्ष केपी शर्मा ओलीले एमालेका सांसद्हरूलाई बजेटमाथिको छलफलका क्रममा तथ्य–तथ्यांकसहित विपक्षीको तर्क खण्डन गर्न निर्देशन दिएका छन् ।

नयाँ बानेश्वरस्थित संघीय संसद् भवनको ल्होत्से भवनमा जारी संसदीय दलको बैठकमा उनले पार्टीका सांसदहरूलाई बजेटको पक्षमा तथ्य–तथ्यांकसहित विपक्षीको तर्क खण्डन गर्न निर्देशन दिएका हुन् ।

‘भोलिबाट बजेटमाथि छलफल प्रारम्भ हुँदैछ । माननीयज्यूहरूले त्यहाँ बजेट किन ठीक छ ? तर्कपूर्ण ढंगले कुरा राख्नुपर्ने छ । विरोधीहरुले हामीलाई हो कि भन्ने गरी, धरमर हुने गरी कुतर्कहरू राख्ने छन्,’ प्रधानमन्त्री ओलीले भने, ‘ती कुतर्कहरूको हामीले खण्डन गर्नुपर्ने छ । दह्रो गरी खण्डन गर्नुपर्ने छ । तर्कयुक्त ढंगले खण्डन गर्नुपर्ने छ । तथ्य–तथ्यांकसहित खण्डन गर्नुपर्ने छ ।’

उनले सांसदहरूलाई बजेट माथिको छलफलका क्रममा संसद्मा बोल्दा छरपस्ट ढंगले नबोल्नसमेत सुझाव दिए । ‘छरपस्ट नबोल्नुहोला, आफ्नो विषयमा केन्द्रित रहेर बोल्नुहोला,’ प्रधानमन्त्री ओलीले भने ।