काठमाडौं– नेपाल विद्यार्थी संघ (नेविसंघ)का अध्यक्ष दुजाङ शेर्पामाथि कारबाहीको माग गर्दै मातृ पार्टी नेपाली कांग्रेसको केन्द्रीय अनुशासन समितिमा उजुरी परेको छ । 

केन्द्रीय सदस्यद्वय अशोकसिंह बिष्ट, अनुराग शाह र नेविसंघका रत्न राज्य (आरआर) क्याम्पस इकाई अध्यक्ष जितेन्द्र तिमिल्सिनाले शुक्रबार अनुशासन समितिमा उजुरी दिएका हुन् । 

०३६ सालदेखि एउटा सदस्यसम्म नजितेको आरआर क्याम्पसबाट नेविसंघमा प्रतिनिधित्व गर्ने केन्द्रीय सदस्यहरू र क्याम्पस इकाईको सयोजनमा सचिवसहित ५ जना सदस्यलाई स्ववियु निर्वाचनमा सहभागी गराउँदा संगठन विरोधी गतिविधि गरेको भन्दै स्पष्टीकरण सोधिएपछि उनीहरूले उजुरी दिएको बताएका छन् ।

‘स्पष्टीकरणको पत्र सामाजिक सञ्जालमा देखिएकोले यस्ता संगठन ध्वस्त बनाउन उद्धृत कार्यकाल सकिएका नेविसंघका अध्यक्ष दुजाङ शेर्पा र अवैधानिक अनुशासन समिति संयोजक परोपकार अधिकारीमाथि आवश्यक छानबिन गरी साधारण सदस्य समेत नरहने गरी कारबाही गरिपाऊँ भनी विनम्र अनुरोध गर्दछौँ,’ उनीहरूले दिएको उजुरीमा भनिएको छ ।