काठमाडौं – दिनेश राउतको निर्देशनमा बनिरहेको मल्टिस्टारर फिल्म ‘महाभोज’को छायाङ्कन सकिएको छ । शुक्रबार नायक खगेन्द्र लामिछाने र नायिका अञ्जना बराइलीको अंशको दृश्य खिचेसँगै फिल्मको छायाङ्कन पूरा भएको हो ।

यो फिल्मको छायाङ्कन माघ ८ गते पोखराको घाकाचोकबाट सुरु भएको थियो । पहिलो चरणको छायाङ्कन पोखरामा ३३ दिन चलेको थियो । दोस्रो चरणको छायाङ्कन दुई दिन काठमाडौंमा भएको हो ।

पूर्वनिर्धारित ३५ दिनको तालिकामै फिल्मको छायाङ्कन सकिएको हो । फिल्ममा केन्द्रीय भूमिकामा खगेन्द्र र अञ्जनासहित आर्यन सिग्देल, दायाहाङ राई, गौमाया गुरुङ, मलिका महत शीर्ष भूमिकामा रहेका छन् ।

सहायक भूमिकाका लागि वसुन्धरा भुसाल, मोहन निरौला, बुद्धि तामाङ, कमलमणि नेपाल, पुष्कर गुरुङ लगायतका चर्चित कलाकारहरु छन् ।

छायाङ्कनको काम पूरा भएपछि निर्माण पक्ष पोस्ट प्रोडक्सनको काममा प्रवेश गरेको छ । निर्माण पक्षले छायाङ्कन पूरा भइसक्दा पनि प्रदर्शन मिति तय गरेको छैन । केही समयपछि उपयुक्त समय चयन गरेर प्रदर्शन मितिबारे जानकारी दिने निर्देशक राउतले बताए ।

यस फिल्मको लेखक विकास सुबेदी हुन् । क्लक वर्क क्रियशन र पिक्चर फ्रेमको संयुक्त निर्माणमा तयार भएको यस चलचित्रका निर्माता हिमाल कडरिया हुन् ।