काठमाडौं– आगामी दुई वर्षसम्म भारतीय हवाइ यात्रुको सङ्ख्या ७ प्रतिशतले बढ्ने निष्कर्षसहितको प्रतिवेदन सार्वजनिक भएको छ । केयरएजले सार्वजनिक गरेको प्रतिवेदनमा आर्थिक वर्ष सन् २०२४–२५ देखि सन् २०२६–२७ सम्म हरेक वर्ष विमानस्थलमा यात्रुको सङ्ख्या ७ प्रतिशतले वृद्धि हुने जनाइएको छ ।

सन् २०२४–२५ मा भारतमा हवाई यात्रुको सङ्ख्या ४१ करोड २० लाख रहेको छ । सन् २०२६–२७ मा यो बढेर ४७ करोड पुग्नेछ । चीन र अमेरिकापछि भारत विश्वको तेस्रो ठूलो हवाई बजार हो ।

हवाई सुरक्षामा बढ्दो चासो, वाइडबडी जहाजको ढिला आपूर्ति र भूराजनीतिक तनावका बावजुद यात्रुको सङ्ख्यामा उल्लेख्य वृद्धि हुने प्रतिवेदनमा उल्लेख छ ।

प्रतिवेदनलाई उद्धृत गर्दै भारतीय आर्थिक अखबार इकोनोमिक टाइम्सले जनाएअनुसार दीर्घकालसम्म भारतीय विमानस्थलमा यात्रु सङ्ख्या बढ्दै जानेछ ।