काठमाडौं- अमेरिकी राष्ट्रपति डोनाल्ड ट्रम्पका व्यापार सल्लाहकार पिटर नभारोले रुसबाट तेल खरिद गरेर भारतका ब्राम्हणहरुले मुनाफा कमाइरहेको आरोप लगाएका छन् । फक्स न्यूजलाई दिएको अन्तरवार्ताका क्रममा नभारोले रुसी तेलको कारोबारबाट भारतका ब्राम्हणहरुले मुनाफा कमाइरहेको बताएका हुन् ।

उनले भने, ‘म भन्न चाहन्छ, भारतीय जनताहरु, यहाँ के भइरहेको भनेर कृपया बुझ्नुहोस्, भारतीय जनताको खर्चमा ब्राम्हणहरुले मुनाफा कमाइरहेका छन् । हामीले यसलाई रोक्नुपर्छ ।’ भारतले रुसी तेल खरिद गरिरहेको विषयमा अमेरिकाले भारतमाथि भन्सार शुल्क बढाएपछि अमेरिकी अधिकारीहरुले एकपछि अर्को बयान दिइरहेका छन् ।

उनले भारतीय प्रधानमन्त्री नरेन्द्र मोदीलाई महान् नेताको संज्ञा दिँदै विश्वको सबैभन्दा ठूलो लोकतान्त्रिक मुलुकका प्रधानमन्त्री रहेका उनी किन रुसी राष्ट्रपति भ्लादिमिर पुटिन र चिनियाँ राष्ट्रपति सी जिन्पिङसँग भेट गरिरहेका छन् भनेर आफूले बुझ्न नसकेको नभारोले बताए ।

मोदी हाल साङ्घाई सहयोग संगठन एससीओको सम्मेलनमा सहभागी हुन चीनको तियान्जिन शहरमा छन् । त्यहाँ उनले सी र पुटिनसँग भेटवार्ता पनि गरेका छन् ।