काठमाडौं– राष्ट्रिय स्वतन्त्र पार्टी (रास्वपा)का केन्द्रीय सदस्य गणेश कार्कीले रूपन्देही– ३ का लागि उम्मेदवार छनोट प्रक्रियाबारे छानबिन गरेर निष्कर्षमा पुग्नुपर्ने बताएका छन् ।

पार्टीले उपनिर्वाचनका लागि डा. लेखजंग थापाको नाम घोषणा गरेको १४ घण्टा नबित्दै उनले छनोट प्रक्रियाबारे छानबिन गरेर निष्कर्षमा पुग्नुपर्ने बताएका हुन् ।

कार्कीले ०७९ को निर्वाचनको परिणामपछि समानुपातिकतर्फका उम्मेदवार छनोटका लागि १२ क्लस्टरमा चुनाव भएर नतिजा निकालेर सांसदका लागि ६ वटा क्लस्टर बनाएर आफूलाई बाहिर राखिएको स्मरण गरेका छन् ।

‘मैले पटक पटक दाेहाेर्‍याइरहेकाे तथ्य हो, पार्टीको समानुपातिक सांसद छनौट १२ क्लस्टरमा चुनाव भएर नतिजा निकालिएको थियो । पछि सांसद छान्दा ६ क्लस्टर बनाइयो र म धपाइएँ,’ कार्कीले फेसबुकमा लेखेका छन्, ‘यसैले मैले आफू अलग्गै रहेर यसपटकको उम्मेदवार छनौटको प्रक्रिया चासोका साथ हेरेँ । प्रक्रियामा कुनै त्रुटि भएको जस्तो लाग्थेन र अहिले पनि त्रुटि भएकै हो भन्ने मेरो धारणा बनेको छैन । यद्यपि केही कमजोरी भएका हुन सक्छन्, जसको छानबिन र निष्कर्ष आवश्यक छ ।’

पहिलेको समानुपातिक सांसद छनोटको विवाद समाधानमा नपुगेका कारण बेलाबेला भिन्न स्वरूपमा निस्किरहेको भन्दै  उनले यसले नयाँ प्रणाली निर्माणमा शङ्का बढाउने उल्लेख गरेका छन् । ‘त्रुटि हुने वा भएको आशङ्का हुने तर त्यसको निरूपण नहुने हो भने ती थुप्रिँदै गएर थामी नसक्नुका बन्छन्,’ कार्कीको तर्क छ ।

केन्द्रीय सदस्य कार्कीले उम्मेदवार थापाले पहिलेको श्रीमतीसँग छोडपत्र गरिसकेको भए पनि दुई जनाबीचको सम्बन्ध सुमधुर रहेको जानकारी आफूले पाएको पनि उल्लेख गरेका छन् ।

‘लेखजंग थापाको बहुविवाहका सन्दर्भमा पहिलेकी श्रीमतीसँग छोडपत्र भइसकेको तर सम्बन्ध चाहिँ अहिले पनि सुमधुर रहेको भन्ने जानकारी प्राप्त गरेको छु,’ उनले लेखेका छन्, ‘कानूनीरूपमा सम्बन्धविच्छेद भएको भए अन्य त व्यक्तिगत र पारिवारिक सन्दर्भको विषय भइहाल्यो । एउटा सम्बन्ध ‘बिग्रिए पछि’ कि मर्नु कि एक्लै जिन्दगीभर बस्नु भन्ने कसैले पनि चाहँदैन भन्ने मानेको छु ।’