काठमाडौं – अगामी असोज १३ अर्थात् फूलपातीलाई पाँच फिल्मले प्रदर्शन मिति तोके पनि तीन मात्रै हलमा लाग्ने भएका छन् ।

फिल्महरु ‘बलिदान’, ‘माइतीघर’ र ‘हरिबहादुरको जुत्ता’ यस दशैँमा प्रदर्शनमा आउने भएका हुन् ।

दुई फिल्म ‘माइतीघर’ र ‘हरिबहादुरको जुत्ता’ले शुक्रबार फर्स्टलुक पोस्टर सार्वजनिक गरेका छन् । उक्त पोस्टरहरुमा दुवैले प्रदर्शन मिति फूलपातीलाई नै तोकेका छन् ।

गत जेठमा नै फिल्म ‘बलिदान’को पहिलो पोस्टर सार्वजनिक गरी प्रदर्शन मिति फूलपातीलाई तोकिएको थियो ।

अर्थात्, आगामी दशैँमा तीन फिल्म ‘बलिदान’, ‘माइतीघर’ र ‘हरिबहादुरको जुत्ता’ बक्स अफिस भिडन्त हुने पक्का भएको छ ।

‘बलिदान’को नायक समीर भट्ट हुन् । यस फिल्ममा नायकहरु सौगात मल्ल, अपर्ण थापा र नायिका ऋचा शर्माको समेत अभिनय रहने बताइएको छ । निर्देशक भने सन्तोष सेन हुन् ।

त्यस्तै, ‘माइतीघर’को नायकहरु धिरज मगर, प्रकाश सपुत र नायिका उपासनासिंह ठकुरी हुन् । यसको निर्देशक मिलन तमाङ हुन् भने निर्माता रोहित अधिकारी हुन् ।

वरिष्ठ कलाकार हरिवंश को चर्चित पात्र हरिबहादुरको चरित्रमा ‘हरिबहादुरको जुत्ता’ बनेको हो । यसको शीर्ष भूमिकामा हरिवंश नै रहेका छन् । दीपेन्द्र के खनालको निर्देशनमा बनेको यस फिल्मका नायिकाहरु स्वस्तिमा खड्का र प्रियंका कार्की हुन् । प्रकाश सपुत पनि यस फिल्मको शीर्ष भूमिकामा रहेका छन् ।