काठमाडौं – फिल्म ‘परालको आगो’मा जितु नेपालको बहिर्गमनसँगै नायक सौगात मल्लको प्रवेश भएको छ । जितुका लागि तय गरिएको भूमिकाका लागि सौगातको प्रवेश भएको बुझिएको छ ।

निर्माण पक्षले सौगात अनुबन्ध भएको शुक्रबार सार्वजनिक गरेको हो । समय नमिल्ने कारण देखाएर जितुले यस फिल्मको छायाङ्कनमा सहभागी हुन नसक्ने बताएपछि निर्माण पक्षले उनको विकल्प खोजेको हो ।

निर्माण पक्षका अनुसार सौगातले यस फिल्ममा ‘जुठे दमाई’को पात्र निर्वाह गर्ने छन् । फिल्ममा यसअघि नै प्रकाश सपुत र नायिका सुहाना थापा शीर्ष भूमिकाका लागि अनुबन्ध भइसकेका छन् ।

निर्माण पक्षका अनुसार सौगातको प्रवेशसँगै यस फिल्मका लागि शीर्ष कलाकार चयनको काम सकिएको छ ।

यो फिल्म कथाकार गुरुप्रसाद मैनालीको चर्चित कथा ‘परालको आगो’मा आधारित रहेर बन्नेछ ।

भदौ २६ गतेदेखि म्याग्दीबाट छायाङ्कन सुरु गर्ने योजनामा निर्देशक लक्ष्मण सुनार रहेका छन् । हरि ओम सिने मेकर्स प्रालीको ब्यानरमा बन्ने यस फिल्मको निर्माता सुशील पोखरेल हुन् ।