काठमाडौं– प्रतिनिधिसभाको राज्य व्यवस्था तथा सुशासन समितिका सभापति रामहरि खतिवडाले निजामती कर्मचारीसम्बन्धी विधेयकमा भएको छेडखानीबारे नेपाली कांग्रेसलाई जानकारी गराएका छन् । 

ललितपुरको सानेपामा जारी केन्द्रीय कार्यसमितिको मंगलबारको बैठकमा उनले केन्द्रीय सदस्यका हैसियतमा बोल्दै विधेयकमा संसदीय समितिबाट सर्वसम्मत व्यवस्था गरिएको ‘कुलिङ पिरियड’ मा भएको छेडखानीबारे जानकारी गराएका हुन् । 

खतिवडाले बैठकमा समितिले ‘कुलिङ पिरियड’ राख्न समितिले गरेको सर्वसम्मत निर्णय र छेडखानी पछि गरिरहेको कामबारे जानकारी दिए । उनले मंगलबारमात्रै समितिले सभामुख देवराज घिमिरेलाई समिति गठन गरेर छानबिन गर्न आग्रह गरेको पनि बताए । 

उनले विधेयकमा भएको छेडखानीबारे विज्ञप्ति जारी गर्नका लागि आफूले पार्टीसमक्ष अनुमति मागेको बैठकलाई जानकारी गराए । सभापति खतिवडाले बैठकमा आफूले जारी गर्न गइरहेको विज्ञप्तिमा खाका पढेर पनि सुनाएका छन् ।