काठमाडौं– नेपाली कांग्रेसको सुचना, सञ्चार तथा प्रचार विभाग प्रमुख मीन विश्वकर्माले राज्यको सर्वोच्च अंग संसद्ले सम्पादन गरेका काममा जालसाँची गरिए विश्वास गर्ने निकाय बाँकी नै नरहने टिप्पणी गरेका छन् । 

प्रतिनिधिसभाबाट पारित भएको निजामती कर्मचारीसम्बन्धी विधेयकमा गरिएको ‘कुलिङ पिरियड’को व्यवस्थामा छेडखानी भएपछि उनले यस्तो टिप्पणी गरेका हुन् ।  

‘संसद् जस्तो गरिमामय राज्यको सर्वोच्च अंगले सम्पादन गरेका कार्यमा किर्ते, जालसाँची, बदमासी र वैमानी हुन्छ भने कसलाई विश्वास गर्ने ?,’ विश्वकर्माले सामाजिक सञ्जाल फेसबुकमा लेखेका छन् । 

उनले सांसदले आफ्नो जिम्मेवारी र दायित्व बहन नगरेको अवस्थामा उठाउनु पर्ने कदमका बारेमा प्रमुख दलहरू बीच गम्भीर समालोचना गर्नुपर्नेमा पनि जोड दिएका छन् । 

‘सांसदको योग्यता, जिम्मेवारी र दायित्व कस्तो हुनुपर्छ ?,’ प्रश्न गर्दै विश्वकर्माले प्रस्ताव गरेका छन्, ‘बहन नगरे के हुने मुख्य दलहरूले गम्भीरतापूर्वक समालोचना गरौँ र निर्मम निर्णय गरौँ ।’