काठमाडौं – सहकारी ठगीको मुद्दा उठान गरेको फिल्म ‘महाभोज’को प्रदर्शन देशमा विकसित राजनीतिक घटनाक्रमले पछि सरेको छ ।

जेठ १५ गते प्रदर्शन मिति तोकिएको यस फिल्म सोही दिन राजावादीको र नेकपा एमालेको शक्ति प्रदर्शन हुने भएपछि रोकिएको थियो ।

यो फिल्मको जेठ १३ गते स्पेशल प्रि-भ्यू पनि गरिएको थियो । १४ गते दिउँसो प्रदर्शन स्थागित गरेको सूचना निर्माण पक्षले निकालेको थियो ।

सुरुमा यो फिल्मको प्रदर्शन स्थगन गरिएको मात्रै जानकारी दिइएको थियो । नयाँ प्रदर्शन मितिबारे निर्माण पक्षले केही जानकारी दिएको थिएन ।

शनिबार निर्माण पक्षले जेठ ३० लाई नयाँ प्रदर्शन मिति तोकिएको जानकारी दिएको छ ।

पूर्वनिर्धारित मितिमा फिल्म प्रदर्शनमा ल्याउने अवस्था नबनेकामा निर्देशक राउतले माफीसमेत मागेका छन् ।

उनले भने, ‘हामीले धेरै मिहिनेतका साथ तयार पारेको फिल्म केही विशेष परिस्थितिका कारणले निर्धारित मितिमा रिलिज गर्न सकेनौँ । दर्शकहरूप्रति यसबाट असहजता सिर्जना भएकोमा हामी क्षमा प्रार्थी छौँ ।’

विकास सुबेदीले लेखेको यस फिल्ममा नायकहरु आर्यन सिग्देल, दयाहाङ राई, खगेन्द्र लामिछाने, नायिकाहरु मलिका महत, गौमाया गुरुङ र अञ्जना बराइली शीर्ष भूमिकामा छन् ।

क्लक वर्क क्रियसन र पिक्चर फ्रेमको सहकार्यमा बनेको यस फिल्मका निर्माता हिमाल कडरिया हुन् ।