काठमाडौं– भारतको शिवसेना पार्टीका सांसद श्रीकान्त शिन्देले पाकिस्तानको चर्को आलोचना गरेका छन् ।

भारतले पाकिस्तानी भूमिमा रहेका आतंककारी पूर्वाधारलाई लक्षित गरी सञ्चालन गरेको ‘अपरेशन सिन्दुर’ बारे विश्वलाई जानकारी दिन हाल उनी अफ्रिकी महादेशको भ्रमणमा छन् ।

अफ्रिकाको कङ्गोमा रहँदा उनले विश्वभर भारतले प्रतिभावान जनशक्ति र प्रविधिको निर्यात गरिरहेकोमा पाकिस्तानले भने आतंकवादको निर्यात गर्दै आएको टिप्पणी गरे । उनले भारतले व्यापारिक करिडोर निर्माण गरेको र त्यसको विपरीत पाकिस्तानले भने आतंककारी करिडोर निर्माण गरिरहेको बताए ।

भारतीय समाचार संस्था एएनआईका अनुसार कङ्गोमा रहँदा शिन्दे नेतृत्वको भारतीय सांसदहरुको टोलीले त्यहाँका राजनीतिक दलका नेताहरुसँग छलफल गरेका थिए ।

कङ्गोली राजनीतिक दलका नेताहरुले शिन्दे नेतृत्वको भारतीय प्रतिनिधिमण्डललाई आतंकवादविरुद्ध ऐक्यबद्धता जाहेर गरेका थिए ।