काठमाडौं– विश्वका धनाढ्य अर्बपति उद्यमी इलोन मस्कको आँखामा कालो दाग देखिएको छ । अमेरिकी राष्ट्रपति डोनाल्ड ट्रम्पसँगै ह्वाइट हाउसमा देखा परेका मस्कको आँखामा कालो दाग देखिएको हो ।

यस्तोमा कसैले उनको अनुहारमा मुक्का हानेको हुनसक्ने हल्ला फैलिएको छ । मस्कले यसबारे प्रष्टोक्ति दिएका छन् ।

खासमा सरकारी चुस्तता विभागको जिम्मेवारीबाट बाहिरिने बेला मस्क ट्रम्पसँगै देखा परेका थिए । ट्रम्पको छेउमा उभिएका मस्कको आँखामा स्पष्टसँग कालो दाग देखिएको थियो ।

त्यसपछि पत्रकारहरुले उनीसँग यसबारे जवाफ मागेका थिए । यसको जवाफमा मस्कले आफू फ्रान्सनजिकै नगएको हास्यास्पद टिप्पणी गरेका थिए ।

हालै आफ्नी श्रीमतीबाट मुक्का खाएका फ्रान्सेली राष्ट्रपति इम्मानुएल म्याक्रोँलाई लक्षित गरी मस्कले यस्तो टिप्पणी गरेको अमेरिकी सञ्चार माध्यमले जनाएका छन् । केही दिनअघि भियतनाम भ्रमण गर्ने क्रममा म्याक्रोँलाई फ्रान्सकी प्रथम महिला ब्रिजेटले राष्ट्रपतीय जहाजमै मुक्का हानेको भिडियो भाइरल भएको थियो ।

ट्रम्पसँगको भेटमा मस्कले आफूलाई छोरा एक्सले मुक्का हानेको प्रष्ट्याएका थिए । जिस्किरहेका बेला आफैँले एक्सलाई मुक्का हान्न लगाएको उनले बताए ।

पछि ट्रम्पले मस्कको बचाउ गर्दै ‘एक्सले नै गरेको हुनुपर्छ’ बताएका थिए ।

शुरुमा मुक्का हान्दा आफूलाई केही नभएपनि पछि आँखामा दाग बसेको मस्कले बताए ।