श्रमिक दिवसका अवसरमा श्रमिकका हक, अधिकारका विषयमा नेताहरूले मुठ्ठी कसेर प्रतिवद्धता जनाइरहँदा इँटाभट्टामा काम गर्ने मजदुर भने बेखबर देखिए । हिलो माटोलाई चारकुने आकार दिएर रोजीरोटीको व्यवस्था गरिरहेका मजदुरहरूको दिनरात चर्खा घुमेसरह बित्छ ।  

खबरहब टोली भक्तपुरको इँट्टा भट्टा पुग्दा केही श्रमिकहरू भट्टीमै काम गरिरहेको भेटिए । रामेछाप नगरपालिका वडा नम्बर २ का गंगाबहादुर मगर १४ वर्षदेखि माटोसँगै परेड खेलिरहेका छन् । सानो परिवार भएको हुनाले आफ्नो कमाइले जीवन धान्न सहज भएको अनुभव उनको छ ।

त्यस्तै काभ्रेका वीरबहादुर वाइबा उमेरले ५२ वर्ष पुगे ।  उनी २२ वर्षदेखि यहाँ काम गरिरहेका छन् । श्रमिक दिवसका बारेमा उनले सुन्न त सुनेका छन तर वर्षाका कारण उत्सव मनाउन जान नसकेको बताए । रातदिन माटोमा श्रम गर्दा पनि कमाइ २० हजार नाघ्न नसक्दा उनलाई पीडा हुन्छ । अन्य काम नपाउने भएकाले आफू यही काममा जोतिनुपरेको दुखेसो वाइबाको छ । 

उमेरले ५५ नाघेका राजकुमार खड्का ५–६ महिना देखि तलब नपाएको गुनासो गर्छन् । रातदिन माटोमा नङ्ग्रा खियाउँदा पनि हातमुख जोर्न, सन्तानको भरणपोषण र स्कुलको फी तिर्न नसकेकोमा गुनासो छ । काम गरेर पनि ऋणमा जीवन चलाउनु परेको पीडाले मन भतभती पोल्ने गरेको खड्का सुनाउँछन् । 

भट्टामै भेटिएका अर्का मजदुर हुन्– सिन्धुपाल्चोकका कुलबहादुर पुरी । प्राविधिकको काम गर्दै आएका उनी पाँच महिनादेखि पारिश्रमिक नपाएको बताउँछन् ।  उधारोमा तेलचामल किनिरहेको बताउने उनी श्रमको सम्मान हुन नसकेकोमा दुखी छन् । 

काभ्रे पनौतीका ५३ वर्षे अनिल वाइबाको पनि समान भोगाइ छ । उनले पनि महिनौँदेखि तलब पाएका छैनन् । भट्टामा कोइला हाल्ने काम गर्ने अनिल आफ्नो काम छोड्न नमिल्ने खालको रहेको बताउँछन् ।