काठमाडौं – तीन वर्ष अघि निर्माण कार्य सम्पन्न भएको डोल्पाको मसिनेचौर विमानस्थल अझै सञ्चालनमा आउन सकेको छैन ।

त्रिपुरासुन्दरी नगरपालिका वडा नं ७ पहाडामा रहेको उक्त विमानस्थलको कालोपत्रे लगायत पूर्वाधार निर्माणको काम २०७८ सालमै सकिए पनि अझै सञ्चालनमा आउन सकेको छैन । मसिनेचौर विमानस्थल २०५१ सालमा शिलान्यास भएर ०५२ साल देखि निर्माण सुरु भएको थियो ।

जहाज चढ्ने आसामा रोपनी जग्गा विमानस्थललाई दिएका पहाडाबासीले २९ वर्ष पर्खँदा पनि जहाज देख्न अझै पाएका छैनन् । तत्कालीन जिल्ला विकास समितिका सभापति स्वर्गीय ओमबहादुर बुढाले शिलान्यास गरेको उक्त विमानस्थल निर्माणका लागि हालसम्म राज्यको २८ करोड ६० लाख खर्च भइसकेको छ । 

विमानस्थल सञ्चालनका लागि आवश्यक सम्पूर्ण पूर्वाधार निर्माणको काम भइसकेकाले जतिसक्दो छिटो परीक्षण उडान स्थानीयको माग छ ।

तत्कालीन संस्कृति पर्यटन तथा नागरिक उडड्यमन्त्री सुदन किराँतीले दुई पटक परीक्षण उडानको मिति तोके पनि उडान नभएको डोल्पालीको गुनासो छ । निर्माण पुरा भएको लामोसमय बितिसक्दा पनि जहाज नआए पछि राज्यको करोडौँ लगानी भएको मसिनेचौर बिमानस्थलका भौतिक संरचना जीर्ण बन्न थालेका छन् ।