काठमाडौं– उपप्रधानमन्त्री एवम् सहरी विकासमन्त्री प्रकाशमान सिंहले राजनीतिमा विभिन्न चरित्रहरू देखा परेको भन्दै सही–गलत छुट्याउन आग्रह गरेका छन् ।

काठमाडौं–१ मा रहेको विश्व निकेतन मावि ७९ औँ वार्षिक साधारणसभा समारोह सम्बोधनका क्रममा उनले विदेशमा बदमासी गरेका र चटेक प्रवृत्तिका राजनीतिमा देखिएको भन्दै सही र गलत नागरिकले छुट्याउन सक्नुपर्ने बताए । 

‘लहलहैमा लाग्यौँ भने कहाँ पुगिन्छ भन्ने कुरामा पनि ध्यान दिन जरुरी छ । जनप्रतिनिधि ठीक भए मात्रै प्राप्त उपलब्धिको रक्षा गर्दै विकासको काम अघि बढ्न सक्छ, सिंहले भने, ‘यहाँ अनेकौँ मान्छेहरू आउँछन् । चटकेहरु पनि आउँछन् । विदेशमा गएर ठूलो–ठूलो काण्ड गरेर नेपाल फर्किएर ठूलो नेता बन्नका लागि मान्छेहरू नआएका होइनन् । आइराख्छन् ।’ 

समाज परिवर्तनका लागि सबैभन्दा उपयुक्त माध्यम राजनीति भएकाले आफूहरूले समाज सेवाका रूपमा राजनीतिलाई लिएको भन्दै सिंहले राजनीतिमा लाग्ने सबै खराब छन् भन्ने भाष्य गलत भएको बताए ।