काठमाडौं- नेकपा एमालेबाट निष्कासित भएपछि नयाँ राजनीतिक दलको तयारीमा रहेका नेता डा. भीमबहादुर रावलले बुधबार काठमाडौंमा पत्रकार सम्मेलन गरेका छन् ।

गत पुस ११ गतेको सचिवालय बैठकबाट एमालेले निष्कासित गरेपछि बुधबार बबरमहलमा पत्रकार सम्मेलन गर्दै उनले खास गरी अध्यक्ष केपी शर्मा ओलीप्रति आक्रोश पोखेका छन् ।

उनले पत्रकार सम्मेलनका क्रममा आफू १० औँ महाधिवेशनमा अध्यक्षमा उठेकै कारण एमालेबाट पाखा लगाइएको निष्कर्ष सुनाए ।

सयौँ पत्रकार र शुभचिन्तकसँग आफ्ना कुरा राख्नुअघि रावलले एउटा कविता सुनाए । ‘लुब्ध नाइके’ शीर्षकको उक्त कविता सुनाएपछि उनले भाषण सुरु गरे।

उनले कविता सुनाउँदा उनका समर्थक र शुभचिन्तकले हुटिङसमेत गरेका थिए। उनले कविताका हरफ सुरु गर्दै भनेका थिए, ‘सिद्धान्त सोधे उत्तेजित हुने के रोग लाग्यो नि ?’
गन्तव्य सोधे लाठो नै लाउने के झोँक जाग्यो नि !’

कविता : लुब्ध नाइके

सिद्धान्त सोधे उत्तेजित हुने के रोग लाग्यो नि
गन्तव्य सोधे लाठो नै लाउने के झोक जाग्यो नि,
तथ्य र सत्य घोच्दछ तिमीलाई के भयो भनन
के दियौ देशलाई घरिना हुँदा प्रश्न त सुनन ।
सुनलाई पित्तल, पित्तललाई सुन किन पो भन्दछौ,
रात-दिन केवल सत्ताको हिसाव लुब्ध भई गन्दछौ !
चामल र ढुंगा उस्तै हो भन्छौँ स्वार्थको बगरमा
फनफनी जनता घुमाउँछौ किन त्यो कालो कहरमा ?
भनन भन तृप्ति तिमीलाई कहिले हुने हो ?
भ्रष्ट आचार, बेलगाम कृत्य असह्य हुने भो,
सामूहिक घर कसरी भन्छौ एकलौटी मेरै हो ?
पाखण्डतन्त्र, अवसरतन्त्र अब त धेरै भो !
यहाँ मातृभूमि चित्कार गर्छिन् अट्टहास गर्दछौ
स्वाधीनता, गौरव जोगाउनु पर्दा लुसुक्क पर्दछौ,
नठान यहाँ स्वाभीमान हाम्रो मरेर जानेछ
शक्तिको उन्माद सबैलाई अब खर्लप्पै खानेछ ।

पुस १७, २०८१, काठमाडौं ।