काठमाडौं– राष्ट्रिय स्वतन्त्र पार्टी (रास्वपा) को केन्द्रीय कमिटी बैठक १९,२० र २१ गते बस्दै छ । सभापति रवि लामिछाने पक्राउ परेपछि पहिलो पटक तीन दिनसम्म केन्द्रीय कमिटी बैठक बस्न लागेको हो। 

यो केन्द्रीय कमिटी बैठकमा प्रदेशका सभापति र महामन्त्रीहरूलाई पनि बोलाइएको रास्वपाले जनाएको छ । बैठकमा पछिल्लो राजनीतिक परिस्थिति तथा रास्वपाको भावी कार्ययोजनाबारे छलफल हुने बताइएको छ । 

रास्वपा प्रवक्ता मनिस झाका अनुसार बैठकले अबको पार्टीको कार्यदिशा र कसरी पार्टी अगाडि बढ्ने,  जनतामा पार्टीप्रति कस्तो किसिमको  बुझाइ छ, ती कुराहरूको विषयमा पनि छलफल हुने छ । 

रास्वपाले हाल ६० भन्दा धेरै स्थानमा जिल्ला भेला गरिसकेकाले त्यसबारेमा पनि बैठकमा रिपोर्टिङ हुने बताइएको छ । रास्वपाले आगामी वैशाख तेस्रो साता केन्द्रीय महाधिवेशन गर्ने तयारी गरेको छ । तर सभापति जेल जाने अवस्था भए रास्वपाले महाधिवेशन गर्छ या गर्दैन भन्ने कुर अन्योल छ । 

यता रास्वपा संसदीय दलमा उपनेता विराजभक्त श्रेष्ठ ती विषयहरूमा पनि बैठकमा छलफल हुने दाबी गर्छन् । उनी यो केन्द्रीय समिति बैठकले रास्वपाको स्पष्ट कार्य योजना, विचार र खाकाहरूमा छलफल हुने बताउँछन् ।