काठमाडौं– भारतको केन्द्रीय बैंक रिजर्भ बैंक अफ इण्डियाका गभर्नर शक्तिकान्त दासलाई ग्लोबल फाइनान्स म्यागजिनले ‘ए प्लस रेटिङ’ प्रदान गरेको छ ।

ग्लोबल फाइनान्सले सार्वजनिक गरेको सेन्ट्रल बैंकर रिपोर्ट कार्ड २०२४ मा गभर्नर दासले ए प्लस ग्रेड प्राप्त गरेका हुन् । उनलाई उक्त म्यागजिनले लगातार दोस्रो वर्ष उक्त ग्रेड प्रदान गरेको हो ।

रिपोर्ट कार्डमा ए प्लस ग्रेड प्राप्त गरेकोमा गभर्नर दासलाई प्रधानमन्त्री नरेन्द्र मोदीले बधाइ दिएका छन् ।

सामाजिक सञ्जालमा पोस्ट गर्दै प्रधानमन्त्री मोदीले उनलाई बधाइ दिएका हुन् । ग्लोबल फाइनान्सले सन् १९९४ देखि यस्तो रिपोर्ट कार्ड प्रकाशित गर्दै आएको छ ।

उक्त म्यागजिनले रिपोर्ट कार्डमा १ सयभन्दा धेरै मुलुकका केन्द्रीय बैंकका गभर्नरको वरियता निर्धारण गर्दछ ।

मुद्रास्फीति नियन्त्रण, आर्थिक वृद्धि लक्ष्य, ब्याजदर व्यवस्थापनजस्ता विषय समेटेर उक्त ए प्लस देखि एफ ग्रेडसम्म प्रदान गरिँदै आएको छ ।