काठमाडौँ– काठमाडौँ उपत्यकाको भक्तपुरमा आठ रात नौ दिनसम्म मनाइने विस्का (विस्केट) जात्राका लागि भैरवनाथको रथ बनाउने काम सुरु भएको छ ।

यो जात्रा प्रत्येक नयाँ वर्ष सुरु हुनु चार दिन अघि र नयाँ वर्ष सुरु भएको पाँचदिनसम्म मनाइन्छ ।  प्यागोडा शैलीमा काठैकाठले बनाइएको भैरवनाथको रथ तान्ने क्रमसँंगै जात्रा प्रारम्भ हुने प्रचलन रहिआएको छ ।

लिच्छविकालदेखि व्यवस्थित रूपमा मनाउन थालिएको यो जात्रा भैरवनाथ तथा भद्रकाली देवीदेवतालाई काठ तथा बेतबाट निर्माण गरिएको प्यागोडा शैलीको कलात्मक रथमा राखी घुमाइन्छ ।

भक्तपुर नगरभित्रका नेवार समुुदायले मनाउने यस जात्रामा तान्त्रिक विधिले निर्माण गरिएको श्रीभैरव र भद्रकालीको रथ तौमडीस्थित पाँचतले मन्दिर प्रांगणबाट क्वाँछे, कुमारीपाटी, साकोथा, सुकुलढोका, गोलमडी, गाःहिटी, भेलुखेल क्षेत्रसम्म तानेर पुर्‍याउने चलन छ ।

रथलाई दुवैतिर डोरीले तान्ने गरिन्छ । एकातिर ६ वटा र अर्कोतिर चार वटा मोटोमोटो डोरी राखेर हजारौँ युवाले रथ तान्ने गर्दछन् ।