काठमाडौं – प्रधानमन्त्री कप एकदिवसीय क्रिकेटमा नेपाल पुलिस क्लबले लुम्बिनी प्रदेशमाथि १ सय ३ रनको फराकिलो जित निकालेको छ ।

मुलपानी क्रिकेट मैदानमा पहिला ब्याटिङ गरेको पुलिसले निर्धारित ३८ ओभरमा सबै विकेट गुमाएर २ सय ४५ रन बनाएको थियो ।

मौसमका कारण ३८ ओभरमा छोट्टाइएको खेलमा पुलिसका आरिफ शेखले ७६ रन बनाए । ओपनर कुशल भुर्तेलले ४८ रन बनाउँदा करण केसीले आक्रामक अर्धशतक पूरा गरे । उनले २७ बलमा ५ चौका र ५ छक्काको मद्दतमा ५७ रन बनाए ।

लुम्बिनीका नर सार्कीले ४ विकेट लिँदा वीर मगरले ३ र कृष्ण कार्की र अभिषेक गौतमले समान १-१ विकेट लिए ।

२४६ रनको लक्ष्य पछ्याएको लुम्बिनी ३६.३ ओभरमा १ सय ४२ रनमा अलआउट भयो । लुम्बिनीका दिलसाद अलिले ३६ र नर सार्कीले ३१ रन बनाउनु बाहेक अन्यले राम्रो प्रदर्शन गर्न सकेनन् ।

पुलिसका कुशल भुर्तेलले ३ र करण केसीले २ विकेट लिए । ललित राजवंशी, सागर ढकाल, रासिद खान र रोशन भुसालले समान १-१ विकेट लिए ।

यसअघि नै प्रधानमन्त्री कपको फाइनलमा प्रवेश गरेको पुलिसको यो प्रतियोगितामा लगातार आठौँ जित हो ।