झापा- प्रमुख प्रतिपक्षी नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले प्रधानमन्त्री केपी शर्मा ओलीको दिमागमा जाल–झेलबाहेक अरु केही नभएको आरोप लगाएका छन् ।

प्रधानमन्त्री ओलीको गृहजिल्ला झापाको गौरीगञ्जमा सोमबार पार्टीद्वारा आयोजित खबरदारी सभालाई सम्बोधन गर्दै प्रचण्डले उनीमाथि यस्तो आरोप लगाएका हुन् ।

‘यो ठाउँ अहिलेका प्रधनमन्त्रीको हो । देशको सबैभन्दा बढी जाली, झेली, कपटी, बेइमानी, मेरो लागि त यति धेरै जाली, यति धेरै झेली मान्छे उनको ठाउँमा सायद म बोल्दैछु । म भन्न चाहन्छु जालझेलबाहेक उहाँको दिमागमा अरु भएको देखिँदैन । उहाँले जालझेल नै गरिराख्नुहुन्छ,’ उनले भने ।

अध्यक्ष प्रचण्डले प्रधानमन्त्री ओलीले गिरीबन्धु टी-स्टेटमा गरेको बदमासीको पर्दाफाँस गरेरै छाड्ने चेतावनीसमेत दिए । ‘म गिरीबन्धु टी-स्टेटमा उहाँ (ओली)ले गरेको बदमासीलाई पर्दाफास गरेरै छोड्ने छु,’ उनले भने ।

भ्रष्टाचारीमाथि कारबाही गर्ने भयो भनेर आफूलाई अलोकतान्त्रिक रुपमा प्रधनमन्त्रीबाट हटाइएको प्रचण्डको दावी थियो ।

‘गिरीबन्धुको, ओम्नीको अनि वाइडबडीको तमाम समस्याहरुको । मलाई प्रधानमन्त्रीबाट जबरजस्ती, अलोकतान्त्रिक, तानाशाही तरिकाले हटाइएको छ,’ प्रचण्डले भने, ‘किन ? भ्रष्टाचारीमाथि कारबाही गर्ने भयो भनेर नै हो । किन भने मेरो सुई अब गिरीबन्धुतिर जाँदै थियो । गिरीबन्धुतिर जाने भनेको ओलीतिर जाने भनेको हो ।’

अध्यक्ष प्रचण्डले भुटानी शरणार्थी प्रकरणमा बेचन झा पक्राउ परेपछि बूढानीलकण्ठतरि सोझिएपछि नेपाली कांग्रेसका सभापति आतंकित भएका जिकिर पनि गरे ।

‘तपाईंहरूलाई थाहै छ बेचन झा पक्राउ परेपछि सुई अर्कोतिर पनि सोझियो,’ उनले कांग्रेस सभापति देउवातर्फ इंगित गर्दै भने, ‘त्यसपछि एउटा आतंक भएको हो । तपाईंहरूले ढुक्कसँग बुझे हुन्छ । सोझो कुरा त्यति नै हो ।’

उनले नुवाकोटको शेरा दरबार प्रकरणमा माओवादी संलग्नता अस्वीकार गरे । ‘हाम्रो पार्टी १५ वर्षअघि छोडिसकेको मान्छेको नाम शेरा दरबारको कुरामा जोडिएको छ । तर माओवादीलाई बिनाकारण मुछिएको छ’, उनले भने, ‘हाम्रै पार्टीका नेता देखिए पनि मैले छुट दिन्नँ । अनुसन्धानमा दोषी देखिए छानबिनमा लानुपर्छ भनेको छु।’