काठमाडौं- संस्कृति पर्यटन तथा नागरिक उड्डयनमन्त्री बद्री पाण्डेले शेर्पाहरूलाई हिमाल जोगाउने वीरहरूको संज्ञा दिएका छन् ।

शुक्रबार नेपाल पर्वतीय प्रतिष्ठानद्वारा आयोजित कार्यक्रमलाई सम्बोधन गर्दै मन्त्री पाण्डेले विश्वमा वीर गोरखाली भनेर चिनिए जस्तै सगरमाथा चिनाउने वीरहरू शेर्पा भएको बताए ।

‘प्रत्येक समाज र देशको आ-आफ्नै संस्कृति छ। वीर गोरखाली र हाम्रा पौरख गर्ने, हिमाल चढ्ने र चढाउने हिमाली शेर्पाहरू हुन्’, उनले भने, ‘हाम्रा साहसी शेर्पाहरूले नै हिमाललाई अन्तर्राष्ट्रियस्तरमा चिनाउनु भएको छ। उहाँहरूले संस्कार र संस्कृति गुमाउने हो भने नेपालको आफ्नो अस्तित्व गुम्छ ।’

मन्त्री पाण्डेले माउन्टेन एकेडेमीलाई अन्तर्राष्ट्रिय शैक्षिक हबका रूपमा अघि बढाउनु पर्नेसमेत बताए।

‘अब यसलाई अन्तर्राष्ट्रिय विश्वविद्यालय बनाउनु पर्छ। सोलुखुम्बु र त्यस वरपरका मात्रै होइन, संसारभरका विद्यार्थी पढ्ने गरि दायरा विस्तार हुनेमा विश्वास व्यक्त गरेको छु’, उनले भने । मन्त्री पाण्डेले नाथम र माउन्टेन एकेडेमीलाई मर्ज नगरिने पनि विश्वास दिए ।

कार्यक्रममा पूर्वमन्त्रीद्वय बलबहादुर केसी र शंकरप्रसाद कोइराला, प्रतिष्ठानका पूर्वअध्यक्षहरू शंकर प्रसाद पाण्डे, प्रेमकुमार श्रेष्ठ, सन्तोष थापा मगर, लाप्पा फुटी शेर्पा सम्मानित भए।