काठमाडौं- गृहमन्त्री रमेश लेखकले मानव बेचबिखनको अपराध अन्तर्राष्ट्रिय रुपमै फैलिएको बताएका छन् ।

नेपाल प्रहरीको मानव बेचबिखन अनुसन्धान ब्यूरोद्वारा मंगलबार जावलाखेलमा आयोजित मानव बेचबिखनविरुद्धको अन्तर्राष्ट्रिय दिवस कार्यक्रममा यसको दुष्प्रभाव विश्वभर विस्तार भइसकेको उनले बताए ।

उनले मानव बेचबिखनलाई साझा दुश्मनका रुपमा लिएर काम गर्नुपर्ने बताउँदै भने, ‘मानव बेचबिखनविरुद्धको लडाइँ निर्मम हुनुपर्छ ।’

शून्य सहनशीलता अपनाएर सरकारले मानव बेचबिखनविरुद्धको अभियानमा पूरा साथ दिने प्रतिबद्धता जनाए ।

‘मानव बेचबिखनविरुद्धको लडाइँमा प्रहरीले मात्रै, होइन सबै लाग्नुपर्छ’, उनले भने, ‘नागरिकमा जनचेतना फैलाउन आवश्यक छ । यसमा विद्यार्थी र शिक्षकले काम गरिदिनुपर्यो ।’

उनले मानव बेचबिखनविरुद्ध पालिकाहरूले पनि साथ दिनुपर्ने बताए । ‘प्रहरी घरघरमा पग्न सक्दैन । मानव बेचबिखनविरुद्ध पालिकाले पनि काम गरिदिनुपर्छ’, उनले भने, ‘मानव बेचबिखनविरुद्धको लडाइँमा केही वर्षभित्रै सकरात्मक परिणाम देखिन्छ । मानव बेचबिखनको अपराधको अनुसन्धानका लागि ३ महिना तोक्न कानुन संशोधन गर्नुपर्छ । अनुसन्धानका लागि २५ दिनको समय पर्याप्त हुँदैन ।’

मानव बेचबिखन अपराधको अनुसन्धानको समय ३ महिना बनाउन गृह मन्त्रालयले कानुन संशोधनका लागि पहल गर्ने वचन पनि उनले प्रहरीलाई दिएका छन् ।