काठमाडौँ– पाकिस्तानमा अहमदिया समुदायविरुद्ध दमनका घटना बढ्न थालेको भन्दै संयुक्त राष्ट्रसंघले चिन्ता व्यक्त गरेको छ ।

पाकिस्तानमा अहमदिया समुदायका मानिसहरुविरुद्ध गैरन्यायिक हत्या र उनीहरुको धर्मस्थलमा आक्रमणका घटना थालेको भन्दै राष्ट्रसंघका विज्ञहरुले चिन्ता प्रकट गरेका हुन् ।

राष्ट्रसंघका ८ जना स्वतन्त्र विज्ञहरुले विज्ञप्ति जारी गर्दै अहमदिया समुदायलाई लक्षित गरी हुँदै आएका दमन र भेदभावविरुद्ध कदम चाल्न सरकारलाई आग्रह गरेका छन् ।

पाकिस्तानबाट प्रकाशित हुने डन अखबारका अनुसार हालै मात्र साद उल्लाह पुरमा अहमदिया समुदायका दुई जनाको गैरन्यायिक हत्या भएको थियो ।

पाकिस्तानमा ५ लाखभन्दा धेरै अहमदिया समुदायका व्यक्तिहरुको बसोबास रहेको बताइन्छ । पाकिस्तानको संविधानले अहमदियाहरुलाई इस्लामिक चिह्न र पहिचानको प्रयोग गर्न दिँदैन ।