काठमाडौं- सुदूरपश्चिमको राजधानी सहर धनगढी उपमहानगरपालिकामा बिहीबार तापक्रम ४४.१ डिग्री सेल्सियस पुगेको छ ।

जल तथा मौसमविज्ञान विभाग अन्तर्गतको महाकाली बेसिन फिल्ड कार्यालय अत्तरियाका अनुसार बिहीबार धनगढीमा तापक्रम ४४.१ डिग्री सेल्सियस मापन गरिएको छ ।

बुधबार दिउँसो गरिएको मापन अनुसार त्यहाँ ४३.३६ डिग्री सेल्सियस तापक्रम थियो । बिहीबार ४४ डिग्रीबाट माथि गएको कार्यालयका मौसमविज्ञान सहायक सिंगल चौधरीले बताए।

उता मंगलबार ४२ डिग्री सेल्सियस मापन भएको थियो । चौधरीले १९९५ पछि बिहीबार बढी तापक्रम मापन भएको जानकारी दिए ।

उनले सन १९९५ जुनमा धनगढीको तापक्रम ४६ दशमलव ४ मापन भएको बताए । बुधबार २९ वर्षपछि उच्च तापक्रम मापन गरिएको थियो ।

बिहीबार काठमाडौँ उपत्यकाको तापक्रम बढेर ३३ डिग्री सेल्सियस पुगेको छ। केही दिनयतादेखि यहाँको तापक्रम बढ्दै गइरहेको  छ ।

नेपालमा अहिलेसम्म मनसुन भित्रिएको छैन, भारतमा आज मात्रै भित्रिएको मौसमविद्ले जनाएका छन् । मनसुन नेपाल आइपुग्न अझै एक साता लाग्ने भएकाले तापक्रमले उचाइ लिएको हो ।