काठमाडौं- याकचौँरी कृषक महासंघको प्रथम महाधिवेशनबाट पावीहाङ राईको नेतृत्वमा नयाँ कार्यसमिति चयन गरिएको छ ।

बुधवार र बिहीबार दुई दिन काठमाडौंको जोरपाटीमा भएको महाधिवेशनबाट भोजपुरका कृषक पावीहाङ राईको नेतृत्व १३ सदस्यीय केन्द्रीय कार्यसमिति चयन गरिएको हो ।

कार्यसमिति उपाध्यक्ष, महासचिव, सचिव र कोषाध्यक्षमा दोलखाका लालकुमार केसी, मुस्ताङका सोजन हिराचन, ताप्लेजुङका विशाल लिम्बू र सोलुखुम्बुका आङफुर्वा शेर्पा चयन भएका छन् ।

कार्यसमिति सदस्यमा मनाङका बेदबहादुर गुरुङ, ओखलढंगाकी माया शेर्पा, बाजुराका छिरिङ तोक्पे गुरुङ, सिन्धुपाल्चोका सर्की शेर्पा, हुम्लाका शुक्रबहादुर शाही, सोलुखुम्बुकी पेमा शेर्पा, जुम्लाकी हेमाकुमारी रोकाया बुढा र इलामका सुन्दर राई चयन भएका छन् ।

महाधिवेशनले सल्लाहकार समिति पनि चयन भएको छ । सल्लाहकार समितिमा रामेछापका दावा साङ्बु शेर्पा, मुगुका छुडिम लामा, मनाङका गमबहादुर गुरुङ, म्याग्दीमा प्रेमबहादुर पुर्जा पुन र ताप्लेजुङका खड्गबहादुर गुरुङ छन् ।

अध्यक्ष राईले नेपालका याक तथा चौँरी कृषकहरूका माग उठान, नीतिगत निर्णयका लागि दबाब तथा यस क्षेत्रको अध्ययन तथा अनुसन्धानमा काम गर्ने जानकारी दिएका छन् ।