काठमाडौं- नेपाली क्रिकेटर सन्दीप लामिछानेलाई अमेरिकी दूतावासले दोस्रो पटक पनि भिसा दिन अस्वीकार गरेको छ।

यही जुनमा हुन लागेको टी-२० विश्वकप क्रिकेट खेल्न प्रशिक्षणरत उनलाई अमेरिकी दूतावासले अन्तरर्वातामा बोलाएर दोस्रो पटक पनि भिसा दिन अस्वीकार गरेको हो ।

यसअघि ९ जेठमा पनि अमेरिकी दूतावासले क्रिकेटर लामिछानेलाई भिसा दिन अस्वीकार गरेको थियो । त्यसबेला  लामिछानेले सामाजिक सञ्जाल फेसबुकमार्फत आफ्नो भिसा अस्वीकृत भएको बताएका थिए ।

नेपाल क्रिकेट संघको निर्णयअनुसार उनी वेस्टइन्डिज र अमेरिकामा यही जुनमा हुने टी-२० विश्वकप खेल्न जाने तयारीमा थियो । नेपाली टोली यसअघि नै विश्वकप खेल्न गइसकेको छ। अहिले नेपाली टोली अभ्यास म्याचमा ब्यस्त छ ।

बिहीबार मात्रै टियु क्रिकेट मैदानमा प्रशिक्षणरत सन्दीपलाई खेलकुद मन्त्री विराजभक्त महर्जनले भेटेर भिसाका लागि सक्दो पहल गरिदिने आश्वासन दिएका थिए । जेठ ९ मा भिसा रिजेक्ट हुँदा पनि नेपाल क्रिकेट संघ (क्यान) सहितले सन्दीपका लागि पहल गरेका थिए ।

केही सांसद र मन्त्रीहरूले पनि सन्दीपलाई भिसा दिन अमेरिकी दूतावासलाई आग्रह गरेका थिए । यस्तोमा बिहीबार अन्तर्वार्तामा बोलाएर सन्दीपलाई दोस्रो पटक पनि भिसा नदिई निराश बनाएको हो ।

यसअघि अमेरिकी दूतावासले सन् २०१९ मा पनि सन्दीपलाई भिसा दिन अस्वीकार गरेको थियो ।

सन् २०१९ मा अमेरिकी दूतावासले भिसा दिन अस्वीकार गरेको कुरा सामाजिक सञ्जालमा पोस्ट गरेपछि बोलाएर भिसा दिइएको थियो ।