काठमाडौं– मंगलबार कर्पोरेट डेभलपमेन्ट बैंकको शेयरमा सकारात्मक सर्किट लागेको छ । मंगलबार बैंकको शेयरमूल्यमा ४४ रुपैयाँ २० पैसाले अर्थात् १० प्रतिशतले बढेर सकारात्मक सर्किट लागेको हो ।

मंगलबारको कारोबारमा बैंकको शेयर प्रतिकित्ता ४८६ रुपैयाँ पुगेको छ । आज न्यूनतम ४४५ रुपैयाँ ६० पैसा र अधिकतम ४८६ रुपैयाँ २० पैसा पुगेको छ । सोसँगै बैंकको शेयर कारोबार मंगलबारको बन्द हुनुभन्दा अगाडि नै बन्द भएको थियो ।

बैंकको ५२ लाख ५० हजार कित्ता शेयर रहेको छ । जसमा ३० प्रतिशत सर्वसाधारणको शेयर छ भने ७० प्रतिशत प्रवर्द्धकको छ । आज लागेको सकारात्मक सर्किटसँगै कम्पनीको मार्केट क्यापिटल २ अर्ब ५५ करोड २५ लाख ५० हजार पुगेको छ ।

९ महिनामा खराब कर्जा ५ प्रतिशत 

बैंकको शेयरमा सकारात्मक सर्किट लागेपनि खराब कर्जा भने ५ प्रतिशत पुगेको छ । जुन मापदण्डअनुसार खतराको संकेत हो । खराब कर्जा बढ्दै जानु भनेको बैंकले लगानी गरेको पैसा उठाउन नसकेको भन्ने बुझिन्छ ।

बैंकले सार्वजनिक गरेको चालु आव ९ महिनाको अपरिष्कृत वित्तीय विवरण अनुसार बैंकको खराब कर्जा ४.९५ प्रतिशत छ । अर्थात् बैंकले जम्मा कर्जा जारी गरेको मध्ये करिब ५ प्रतिशत कर्जा ३ महिना यता उठेको छैन ।

बैंकको खराब कर्जा बढेका कारण नाफामा समेत गिरावट आएको छ । गत वर्षको ९ महिनाको अवधिमा भन्दा चालु आवको चैत मसान्तसम्ममा बैंकको खुद नाफा ३३।०८ प्रतिशतले घटेको छ । चालु आवको ९ महिनामा बैंकले ८७ लाख २४ हजार ७५० रुपैयाँ मात्र खुद नाफा गरेको हो ।

प्रतिशेयर आम्दानी पनि न्यून

बैंकको चालु आवको ९ महिना अवधिमा प्रतिशेयर आम्दानी पनि न्यून रहेको छ । बैंकले सार्वजनिक गरेको वित्तीय विवरणअनुसार बैंकको ९ महिनामा प्रतिशेयर आम्दानी वार्षिक १ रुपैयाँ ६६ पैसा मात्र छ ।

चैत मसान्तसम्ममा बैंकको प्रतिशेयर नेटवर्थ १४४ रुपैयाँ ६७ पैसा र बैंकको शेयर तरलता अनुपात ६१।८१ प्रतिशत छ । बैंकको ९ महिना ५८ दिनमा ६ लाख ३४ हजार ७९४ कित्ता शेयर कारोबार भएको छ ।

बैंकको शेयर दोस्रो बजारमा न्यूनतम प्रतिकित्ता ३६२ रुपैयाँ ६० पैसा र अधिकतम ४७५ रुपैयाँसम्म कारोबार भएको थियो ।