काठमाडौं– संयुक्त ट्रेड युनियन समन्वय केन्द्रले श्रम सम्बन्धी ऐन नियमहरू समय सापेक्ष सुधार र संशोधन गरि प्रभावकारी कार्यान्वयन गर्न सरकारको ध्यानाकर्षण गराएको छ । 

अन्तराष्ट्रिय श्रमिक दिवसको पूर्वसन्ध्यामा मंगलबार काठमाडौंमा पत्रकार सम्मेलन गर्दै केन्द्रले श्रमिकहरूको हक अधिकार स्थापित गर्नका लागि आवश्यक ऐन कानूनहरूलाई समयसापेक्ष परिमार्जन गर्न सरकारको ध्यानाकर्षण गराएको हो ।

केन्द्रले औँद्योगिक सम्बन्धलाई सुमधुर बनाउन र ट्रेड युनियन गतिविधिलाई संस्थान गर्न अनिर्वाय रुपमा सबै प्रतिष्ठानहरूमा सामूहिक सौदाबाजी प्रक्रिया अघि बढाउनुपर्नेमा जोड दिएको छ । 

सार्वजनिक क्षेत्रमा कार्यरत करारका कामदार तथा श्रमिकहरूलाई सामाजिक सुरक्षामा आवद्ध गराउन आगामी बजेटमा आवश्यक रकम बजेट विनियोजित गरि तत्काल कार्यान्वयनमा ल्याउनुपर्ने संयुक्त ट्रेड युनियन समन्वय केन्द्रका अध्यक्ष योगेन्द्र कुमार कुँवरले जानकारी दिए । उनले बुधबार सबै दल निकट ट्रेड युनियनहरूले एकैस्थानमा श्रमिक दिवस मनाउने जानकारी दिए ।

काठमाडौंको भृकुटिमण्डपमा हुने कार्यक्रममा प्रधानमन्त्री लगायतका अन्य दलका शीर्ष नेताले सम्बोधन गर्ने कार्यक्रम छ ।