काठमाडौँ– इलाम निर्वाचन क्षेत्र नम्बर २ मा आगामी वैशाख १५ गते हुने उपनिर्वाचनमा दलहरूले उम्मेदवार छान्ने क्रम जारी रहेको छ ।

अहिलेसम्म नेकपा एमाले, राष्ट्रिय स्वतन्त्र पार्टी (रास्वपा), एकीकृत समाजवादी, राप्रपा र पहिचान पक्षधरले उम्मेदवारको घोषणा गरिसकेका छन् भने नेपाली कांग्रेस र माओवादी केन्द्र उम्मेदवारको टुंगो लगाउने गृहकार्यमा रहेका छन् ।

नेकपा एमालेले तत्कालीन संविधानसभाका अध्यक्ष तथा एमाले उपाध्यक्ष स्वर्गीय सुवास नेम्वाङका छोरा सुहाङ नेम्वाङलाई उम्मेदवार बनाएको छ । यस्तै, रास्वपाले मिलन लिम्बु, राप्रपाले लक्ष्मी गुरुङ र एकीकृत समाजवादीले जितबहादुर राईलाई उम्मेदवार बनाउने घोषणा गरेको छ ।

यसैगरी, कोशी प्रदेशको नाम सच्याउन माग गर्दै आन्दोलनरत पहिचान पक्षधरले डकेन्द्रसिंह थेगिमलाई उम्मेदवार बनाएको छ । यता, जनमत पार्टीले ‘किरात लिम्बूवान प्रदेश नामाङ्कन अभियान’का केन्द्रीय अध्यक्ष प्रेमदीप लिम्बूलाई उम्मेदवार तय गरेको छ ।

अब नेपाली कांग्रेस र माओवादी केन्द्रले उम्मेदवार चयन गर्न बाँकि रहेको छ । यी दुई दल उम्मेदवार चयनको आन्तरिक गृहकार्यमा रहेका छन् । कांग्रेसले आगामी मंगलबार उम्मेदवार घोषणा गर्ने जनाए पनि माओवादी केन्द्र भने अझै अलमलमा रहेको छ ।

२०७९ सालको आमनिर्वाचनमा इलाम–२ बाट निर्वाचि एमाले सांसद सुवास नेम्वाङको गत भदौ २६ गते निधन भएपछि सो क्षेत्रमा उपनिर्वाचन हुन लागेको हो ।

२०७९ को निर्वाचनमा दलहरूको स्थिति

२०७९ को आम निर्वाचनमा नेकपा एमालेका सुवासचन्द्र नेम्बाङ यो क्षेत्रबाट ३० हजार २० मत ल्याएर विजयी बनेका थिए । उनी केवल ११४ मत अन्तरले विजयी भएका थिए ।

उनका निकटतम् प्रतिद्वन्द्वी कांग्रेसका डम्बरबहादुर खड्काले २९ हजार ९०६ मत ल्याएका थिए । कांग्रेसका उम्मेदवारलाई माओवादी केन्द्र र एकीकृत समाजवादीको समर्थन रहेको थियो ।

त्यस्तै रास्वपाका प्रकाश सापकोटाले एक हजार ३८० मत ल्याएका थिए । त्यस्तै मंगोल नेशनल अर्गनाइजेसनका मणि बहादुर लिम्बुले १ हजार ३६३,  राष्ट्रिय जनमुक्तिका खड्ग प्रसाद पालुवाले १ हजार २७२, जसपाका यम प्रसाद लिम्बुले ७२४, राप्रपाका गणेश प्रसाद दुलालले ५१० मत प्राप्त गरेका थिए ।

समानुपातिकतर्फ भने एमालेले २६ हजार ५६२, कांग्रेसले २२ हजार ३३३, माओवादीले ५ हजार १५३ र रास्वपाले ४ हजार ६८६ मत ल्याएका थिए । त्यस्तै राप्रपाले १ हजार १९१, जसपाले ९०६ मत, एकीकृत समाजवादीले ५८६ मत प्राप्त गरेका थिए ।