काठमाडौं– दिनेश राउतको निर्देशन रहने ‘मल्टिस्टारर’ चलचित्र  ‘पुजार सार्की’को छायांकन सुरु भएको छ । कास्कीको कास्कीकोटमा मंगलबार शुभमुहूर्त गरी निर्माण टोली छायांकनमा निस्किएको हो । 

एक महिनामा छायांकन सक्ने लक्ष्यका साथ निर्माण टोली आइतबार कास्कीकोट पुगेको थियो । जातीय विभेदमा आधारित कथा भएकाले सोही गाउँ आसपास छायांकन हुने निर्माण पक्षले जानकारी दिएको छ । 

अभिनेता आर्यन सिग्देल, प्रदीप खड्का र पल शाहले मुख्य भूमिका रहने यो बहुप्रतिक्षित फिल्म हो । तीन नायकको पहिलो सहकार्य भएकाले निर्माणको घोषणादेखि नै फिल्म चर्चामा छ । फस्ट लुक पोस्टर सार्वजनिक हुने बित्तिकै इन्टरनेसनल राइट्स बिक्री भइसकेको छ । 

यी तीन नायकसहित नायिके परीक्षा लिम्बू र अन्जना बराइली पनि मुख्य भूमिकामा देखिँदैछन् । साथमा, मोहन निरौला, लोकेन्द्र लेखक, सुवास गजुरेल, विद्या कार्की, तारा शर्मा, शंकर आचार्य, प्रेम सुब्बा, गोविन्द रमण पराजुली, राजेश बिसुराल लगायतको अभिनय रहनेछ ।

किङ्गडम नेटवर्कको ब्यानरमा बन्ने यो फिल्मका लेखक विकास सुवेदी हुन् भने लगानी सुवास भुसालको रहेको छ ।