काठमाडौं- नेकपा (एकीकृत समाजवादी) पार्टीका महासचिव घनश्याम भुसालले डेडिकेटेड फिडर तथा ट्रंक लाइन विवाद समाधान नहुनुमा प्रधानमन्त्री केपी शर्मा ओली मुख्य दोषी रहेको आरोप लगाएका छन् ।
‘नेपालमा जलसम्पदाको समाजशास्त्र’ विषयक अन्तरक्रिया कार्यक्रमलाई आइतबार सम्बोधन गर्दै उनले डेडिकेटेड फिडर तथा ट्रंक लाइन विवादमा ओली आफैँ लाठी लिएर मैदानमा निस्किएपछि समस्या जटिल बनेको आरोप उनले लगाएका छन् ।
ओलीलाई प्रधानमन्त्रीकै हैसियतमा बस्न सुझाउँदै भुसालले नेपाल विद्युत् प्राधिकरणका प्रबन्ध निर्देशक कुलमान घिसिङलाई काम गर्न दिन पनि सुझाए । डेडिकेटेड फिडर तथा ट्रंक लाइन विवादमा बिजुली बाल्नेले पैसा तिर्नुपर्ने मत भुसालले राखे ।
‘यहाँ ओलीजी आफैँ लाठी लिएर मैदानमा निस्किएपछि धेरै समस्या भएको हो । नत्र यस्तो नहुने थियो । ओलीले राज्य चलाउने हो नि । कानुनी राज्य भए नभएको हेर्ने हो’, उनले भने, ‘एउटा कर्मचारीसँग झगडा गरेको छ । ओली प्रधानमन्त्रीकै हैसियतमा र कुलमान डीजीकै हैसियतमा बस्ने हो भने यो समस्या समाधान हुन्छ ।’
एमालेवाला जाइलाग्छन्
महासचिव अचेल एमालेबारे कमेन्ट गर्दा जाइलाग्ने अवस्था आएको पनि बताए । ‘हिजो मैले एमालेबारे गरेको कमेन्टमा ‘हाम्रो पार्टीतिर किन हेर्छस् ?’ भनेर जवाफ आयो’, उनले भने, ‘एमाले अध्यक्ष ओली स्वेच्छाचारी हुँदै गएका छन् । एमालेमा अहिले उकुसमुकुसको अवस्था छ । अब ओलीले नेतृत्वबाट बाहिर निस्किनु राम्रो हुन्छ ।’
महासचिव भुसाल र एमालेबाट निष्कासित भीम रावलतिर लक्षित गर्दै प्रधानमन्त्री ओलीका प्रमुख राजनीतिक सल्लाहकार विष्णु रिमालले ‘ह्याउ भए आफ्नै पार्टी बनाएर देखाऊ’ भनेर आइतबार कडा प्रतिक्रिया दिएका थिए ।
त्यही प्रसंगमा भुसालले थपे,‘हिजो मैले यसो के कमेन्ट गरेको थिएँ, हाम्रो पार्टीतिर किन हेर्छस् भनेर लेखेछन् । छिमेकको ठूलो घर भत्कियो भने मेरो पनि भत्काइदिन्छ । त्यसले झगडा गर्यो भने मलाई सुत्न दिँदैन । त्यो पड्कियो भने मेरो वरिपरी र परिवारमा पनि समस्या हुन्छ ।’
प्रतिक्रिया