काभ्रे- सोलुखुम्बुको लुक्ला विमानस्थलबाट ६ यात्रुसहित काठमाडौंका लागि उडेको एउटा हेलिकप्टरमा चरो ठोक्किएर क्षति भएको छ ।

हेली एभरेष्टको ९ एन-एकेजी कलसाइनको हेलिकप्टरमा चरो ठोक्किएपछि पाइलटले काभ्रेपलाञ्चोकको बनेपा नगरपालिका-१० स्थित डाँडाबारीमा सुरक्षित अवतरण गराएका थिए ।

आइतबार बिहान १० बजे लुक्लाबाट उडेको हेलिकप्टरमा ११ बजेर २ मिनेटमा चरो ठोक्किएको थियो । चरो ठोक्किएको हेलिकप्टरको अगाडिको भागको शिशामा क्षति पुगेको छ ।

हेलिकप्टरलाई पुनः उडानमा पठाउन प्राविधिक चेकजाँचका लागि काठमाडौंबाट टोली गएको थियो । चरो ठोक्किएको हेलिकप्टरमा चालक र यात्रु सुरक्षित छन्। यात्रुलाई झारेर गाडीमा काठमाडौं पठाइएको थियो ।

अहिले सबै प्राविधिक परीक्षण र सामान्य मर्मतपछि हेलिकप्टर त्रिभुवन विमानस्थलमा अवतरणका लागि काभ्रेबाट उडिसकेको छ ।

करिब आधा घण्टाको अवतरणपछि प्राविधिक परीक्षण गरेर हेलिकोप्टर काठमाडौं पठाइएको हो । हेलिकप्टरमा ५ जना अमेरिकी नागरिक र एक चालकसहित ६ जना सवार थिए ।