उर्लाबारी-अरनिको हस्पिटल उर्लाबारीले मोरङको मिक्लाजुङ-३स्थित सूर्यमुखी प्राथामिक विद्यालयका विद्यार्थीलाई ट्रयाक सुट सहयोग गरेको छ।

बिपन्न परिवारका २५ जना विद्यार्थीलाई विद्यालय परिसरमा आयोजित एक कार्यक्रमबीच ट्रयाक सुट वितरण गरिएको हो ।

हस्पिटलका अध्यक्ष लोलिम पोमु,मिक्लालुङ गाउँपालिका अध्यक्ष बबिकुमार राईले विद्यार्थीलाई ट्रयाक सुट हस्तान्तरण गरे ।

जाडोको समयमा ट्रयाक सुटले न्यानो बनाएर विद्यार्थीलाई ठूलो सहयोग मिलेको स्थानीय समाजसेवी खगेन्द्र मादेनले बताए ।

‘यो विद्यालयमा अतिबिपन्न परिवारका विद्यार्थी अध्ययन गर्छन् । एकसरो कपडा किनिदिन परिवारलाई हम्मे पर्छ’, मादेनले विद्यार्थीलाई देखाउदै भने, ‘यिनीहरूलाई ठूलो राहत मिलेको छ ।’

न्यानो कपडा पाएपछि बिद्यार्थीहरु निक्कै रमाएका थिए। अरनिको हस्पिटलका अध्यक्ष लोलिम पोमुले स्थानीयबाट विद्यार्थीको समस्या सुनेर सहयोग गरेको बताए ।

गाउँपालिका अध्यक्ष बबिकुमार राईले हस्पिटलको काम उदाहरणीय भएको बताएका छन् ।