उर्लाबारी- मोरङको उर्लाबारी नगरपालिकाका नगरप्रमुख गङ्गाप्रसाद खरेलमाथि सोमबार अपरान्ह कार्यालयमै हातपात भएको छ ।

उर्लाबारी –७ का ४२ वर्षीय मिलन भण्डारीले खरेलमाथि कार्यालयमै मुक्का हानेका हुन् ।

सोमबार दिउँसो ११ बजे भण्डारी नगरप्रमुख खरेललाई भेट्न कार्यालय पुगेका व्यवसायी भण्डारीले हातपात गरेका हुन् ।

भण्डारीले नगरप्रमुखसँग योगसम्बन्धी कार्यक्रम सञ्चालनका लागि बजेट माग गरेका थिए ।

नगरप्रमुख खरेलले प्रक्रिया पुर्‍याएर तिहारपछि आउन भनेर बैठकतिर लागेका थिए । तर भण्डारी खरेललाई कुरेर बसेका थिए । खरेल कार्यालयबाट बाहिर निस्किनासाथ सोमबार अपरान्ह ५ बजे मुक्का प्रहार गरेका हुन् ।

मुक्का प्रहार गर्ने भण्डारीलाई नगर प्रहरीले पक्राउ गरी इलाका प्रहरी कार्यालय उर्लाबारीलाई बुझाएको छ ।

इलाका प्रहरी कार्यालय उर्लाबारीका प्रहरी निरीक्षक राकेश यादवले घटनाको अनुसन्धान भइरहेको बताए । भण्डारी उर्लाबारीका चर्चित थेरापिष्ट हुन् ।

उनले यसअघि थेरापी सेन्टर चलाएका थिए । पछिल्लो समय नगर प्रमुख खरेलले विद्यालय शिक्षामा योग र प्राणायामलाई पाठ्यक्रममा राख्नुपर्ने बताइरहेका छन् ।

नगरप्रमुखको उक्त भनाइ अनुसार भण्डारी केही समययता योगाशन र प्राणायामको पाण्डुलीपिलाई पुस्तकाकाकार दिन सहयोगी खोज्दै हिँडिरहेका थिए ।