दोलखा– जिल्लाको उत्तरी गौरीशंकर गाउँपालिका-९ को विकट ना-गाउँमा सौर्य ऊर्जा विस्तार गरिएको छ। समुद्री सतह देखि चार हजार दुई सय मिटर उचाइमा रहेको अति विकट ना-गाउँमा पहिलो पटक सौर्य ऊर्जा मार्फत विद्युत् विस्तार गरिएको हाे ।

नेपाल सरकार ऊर्जा तथा जलस्रोत तथा सिँचाइ मन्त्रालय वैकल्पिक ऊर्जा प्रवर्द्धन केन्द्र,जिल्ला जलस्रोत तथा सिँचाइ विकास डिभिजन कार्यालय दोलखा र गौरीशंकर गाउँपालिकाको अनुदान सहयोगमा ३० किलोवाट पिक सौर्य विद्युत् विस्तार गर्ने काम सम्पन्न भएको सौर्य ऊर्जा विस्तार तथा निर्माण कम्पनी सनब्रीज सनस्टारका आयोजना निर्देशक कुमार बस्नेतले जानकारी दिए ।

निर्माण कम्पनी गत भदौमा सौर्य ऊर्जा विस्तारको लागि ३ करोड ४८ लाख ९९ हजारमा ठेक्का सम्झौतागरि काम सुरु गरेको थियो । एक वर्षभित्र लाइन विस्तार गरिसक्ने जनाएको कम्पनीले ६ महिनामै सौर्य विद्युत् जडानको काम सकेर गत माघ देखी नै लाइन विस्तार गरी ना का ७२ घरधुरी स्थानीयलाई बत्ती वितरण गरेको हो ।

निर्माण कम्पनी सनब्रीज सनस्टार जे.भिले अहिले सौर्य ऊर्जा विस्तार गरिएको ना-गाउँमा प्राविधिक टोलि लिएर अनुगमन गर्न पुगेको छ भने,उच्च लेकको नागाउँका स्थानीय वर्षौँदेखि टुकी बत्ती कै भरमा गुजारा चलाउँदै आएका थिए । लामो समयको प्रतीक्षा पछि राज्यले सौर्य ऊर्जा विस्तार गरिदिएपछि स्थानीय खुसी हुँदै दङ्ग परेको बस्नेत बताए । यहाँ राष्ट्रिय प्रसारण लाई विस्तार गर्न सम्भव नभएकाले स्थानीय वडा तथा पालिकाले लामो समय देखि सौर्य ऊर्जा विस्तारकै लागि पहल गर्दै आएको थियो ।

नेपाल सरकारले ९० प्रतिशत अनुदान सहयोग दिने गरी गत वर्ष जलस्रोत तथा सिँचाइ विकास डिभिजन कार्यालय र गौरीशंकर गाउँपालिकासँग समन्वय गरी १० प्रतिशत अनुदान अन्तर्गत २५ लाख जलस्रोत तथा सिँचाइ विकास डिभिजन कार्यालय दोलखाले लगानी गर्ने तथा स्थानीय गौरीशंकर गाउँपालिकाले ९ लाख ८९ हजार ९ सय लगानी गर्ने सहमति बनेपछि ३ करोड ४८ लाख ९९ हजारमा ठेक्का लगाई सौर्य विद्युत् विस्तार गरिएको हो ।

पर्यटकीय क्षेत्रको रूपमा परिचित ना गाउँमा हिजोआज सौर्य विद्युतले झिलिमिली देखिएको छ। सोलार बत्ती विस्तारले यहाँका स्थानीय लाइनमा मोबाइल चार्ज, टेलिभिजन हेर्न, पानी तताउन र इन्डक्सन चुल्हो जडान गरी खाना, खाजा पकाउन समेत सहज भएको स्थानीयले बताएका छन्। यस क्षेत्रमा सोलार बत्तीको सुविधा भएपछि च्छोरोल्पा हिमताल, दूध कुण्ड घुम्न आउने पर्यटकलाई मोबाइल र क्यामेराको ब्याट्री चार्ज गर्नसमेत राहत मिलेको छ। निर्माण कम्पनीले घर घरमा सोलार बत्ती जडान गर्नुको साथै २० वटा स्ट्रिट लाइट समेत गाउँमा जडान गरिएको निर्देशक बस्नेतले बताए ।

सुबास बस्नेत