काठमाडौँ– अहिलेको कुरा गर्ने हो भने हिन्दी फिल्मबाट सबैभन्दा बढी पारिश्रमिक बुझ्ने नायिका दीपिका पादुकोण हुन् । उनले एउटा फिल्मबाट ४० करोड भारुभन्दा बढी पारिश्रमिक लिन्छिन् ।

दीपिका ५०० करोड क्लबमा प्रवेश गरेको फिल्म ‘पठान’की नायिका पनि हुन् । उनी यो सफलता प्राप्त गर्ने ६ नायिका मध्ये एक हुन् ।

अहिले बलिउडमा दीपिका, सोनाक्षी सिंह, आलिया भट्टलगायतको दबदबा छ । उनीहरु करोडौँमा पारिश्रमिक बुझ्छन् । एक करोड पारिश्रमिक त डेब्यु फिल्ममै नायिकाहरूले बुझ्छन् ।

बलिउडमा कुनै समय यस्तो पनि थियो, जुन बेला एक करोड पारिश्रमिक लिने नायिका चर्चामा आउँथे । यसरी चर्चामा आउने पहिलो नायिका श्रीदेवी हुन् । सन् १९७६ मा प्रदर्शनमा आएको फिल्म ‘मुन्द्रु मुडिचु’ फिल्मका लागि उनले नायक रजनीकान्तको भन्दा बढी पारिश्रमिक लिएको हल्ला चलेको थियो ।

चार वर्षको उमेर बालकलाकारका रुपमा फिल्म क्षेत्रमा प्रवेश गरेकी श्रीदेवीले सन् १९७६ मा मुख्य नायिकाको रुपमा अभिनय गर्ने अवसर पाइन् । विभिन्न भाषाको फिल्ममा अभिनय गर्ने उनले सन् १९७९ मा पहिलो हिन्दी फिल्म ‘सोल्वा सावन’मा अभिनय गरिन् ।

उनको पहिलो हिन्दी फिल्मले सफलताको स्वाद चाख्न सकेन । सन् १९८३ मा प्रदर्शनमा आएको ‘हिम्मतवाला’बाट भने उनी दर्शकको नजरमा परिन् । उनी रातारात सेलिब्रिटी बनिन् । उनले पारिश्रमिक पनि ह्वात्तै बढाइन् ।

सुरुवाती दिनमा एउटा फिल्मबाट ५ हजार पारिश्रमिक लिने श्रीदेवी बलिउडकै महँगो नायिका भइन् । त्यस समयमा उनले एक करोड पारिश्रमिक बुझ्दा केही नायिकाले मात्र सो बराबरको रकम बुझ्थे ।

कुनै समय बलिउडमा सबैभन्दा चर्चामा रहेकी श्रीदेवीको सन् २०१८ मा ५५ वर्षको उमेरमा हृदयघातका कारण धर्तीबाट बिदा भइन् ।