काठमाडौं– ललितपुरको च्यासलस्थित तुल्सीलाल स्मृति प्रतिष्ठानको भवनमा बाढी पसिररहँदा बिलखबन्दमा परेको नेकपा एमालेलाई व्यवसायी मीनबहादुर गुरुङले दिएको जग्गाको विषय संसदीय समितिमा पुगेको छ ।

एमालेको केन्द्रीय कार्यालय बनाउन व्यवसायी गुरुङले एमालेलाई दिएको कीर्तिपुरस्थित १० रोपनी १४ आना जग्गाबारेको विवादलाई नेकपा माओवादी केन्द्रले संघीय संसद्‍को संसदीय समितिमा लगेको हो ।

सोमबार गृहमन्त्री रमेश लेखकसमेत उपस्थित राज्यव्यवस्था तथा सुशासन समितिको बैठकमा प्रमुख प्रतिपक्षी माओवादी केन्द्रका सांसद दुर्गा राईले यसबारे प्रश्न उठाएकी हुन् ।

बैठकमा अख्तियार दुरुपयोग अनुसन्धान आयोग, ऐन २०४८ लाई संशोधन गर्न बनेको विधेयकमाथि छलफलमा सहभागी अख्तियार प्रमुख आयुक्त प्रेमकुमार राईलाई माओवादी सांसद राईले एमालेले लिएको उक्त जग्गा भ्रष्टाचारभित्र पर्छ कि पर्दैन भनेर सोधेकी हुन् ।

‘मीनबहादुर गुरुङबाट कीर्तिपुरको १० रोपनी १४ आना जग्गा सत्तारूढ दलले किन लिएको ? भ्रष्टाचार गर्दिनँ भन्नेले अझ किन लिएको ?’, उनले सोधिन्, ‘एम्नेष्टी इन्टरनेशनले यस्तो कार्यलाई भ्रष्टाचार भनेर परिभाषित गरेको छ। म अख्तियार प्रमुखबाट उत्तर चाहन्छु, त्यो जग्गा लेनदेन प्रकरण भ्रष्टाचार हो कि होइन ?’

कीर्तिपुर नगरपालिकाको मैत्रीनगरस्थित ढुंगेअड्डामा १० रोपनी १४ आना जग्गामा अत्याधुनिक भवन बनाइदिएर अर्को दसैंको घटनास्थापनामा साँचो हस्तान्तरण गर्ने गरी गुरुङले जिम्मा लिएका थिए । त्यहाँ ओलीसहितका एमाले नेताको उपस्थितिमा कार्यालय भवन शिलान्यास पनि भइसकेको छ । तर उक्त जग्गालाई लिएर एमाले नेतृत्वको चर्को आलोचना भइरहेको छ ।