काठमाडौं– नेपाली कांग्रेसले पार्टीका नेता–कार्यकर्ताहरूलाई समुदाय स्तरमा उद्धार तथा सहयोग कार्यमा खटिन निर्देशन दिएको छ । 

महामन्त्री गगनकुमार थापाले शनिबार भिडियो सन्देश जारी गरेर प्राकृतिक विपद्का कारण अप्ठ्यारोमा परेका नागरिकको सहयोगका लागि समुदाय स्तरमा उद्धार तथा सहयोग कार्यमा खटिन निर्देशन दिएका हुन् । 

‘जहाँ हामीले जे कुरा मद्दत गर्नुपर्छ, ती कुराहरूमा पार्टीका सबै साथीहरूलाई जुट्नको लागि आग्रह गर्छु,’ थापाले भिडिओ सन्देशमा भनेका छन्, ‘पार्टीका साथीहरूले सबै कार्यक्रमहरू रोकेर उद्धारमा, राहतमा खट्नको लागि म सबै साथीहरूलाई अपील पनि गर्छु ।’

उनले आइतबार बस्ने पार्टीको केन्द्रीय कार्यसम्पादन समितिको बैठकले विपद्को समयमा उद्धार र राहतका लागि पार्टीपङ्क्तिलाई परिचालन गर्ने बारे निर्णय गर्ने पनि जानकारी दिएका छन् ।  

‘भोलि हाम्रो पार्टीको कार्यसम्पादन समितिको बैठक छ,’ महामन्त्री थापले भनेका छन्, ‘बैठकपछि हामी पार्टीलाई कसरी थप परिचालित गर्ने यो अप्ठ्यारो समयमा उद्धार राहतका लागि भनेर गरिनै हाल्छौँ ।’

महामन्त्री थापाले नागरिकको ज्यानको सुरक्षा गर्ने मुख्य दायित्व सरकारको भएको भन्दै पार्टीका तर्फबाट सरकारको नेतृत्व गरिरहेका कार्यवाहक प्रधानमन्त्री प्रकाशमान सिंहलगायतलाई सम्पूर्ण क्षमता लगाएर नागरिकको उद्धार गर्ने विषयमा ध्यानाकर्षण गरिएको पनि बताएका छन् । 

‘यो बेला नागरिकको ज्यानको सुरक्षा गर्ने मुख्य दायित्व राज्यको हो,’ थापाले भनेका छन्, ‘त्यसैले हामीले कार्यवाहक प्रधानमन्त्री, गृहमन्त्रीलगायत जिम्मेवार साथीहरूलाई पार्टीका तर्फबाट यो बेलामा सम्पूर्ण क्षमता लगाएर नागरिकको उद्धार गर्ने कुरामा, ज्यान जोगाउने कुरामा ध्यानाकर्षण गरिनै रहेका छौँ ।’