काठमाडौं –  प्रधानमन्त्री केपी ओलीले युवाको सुझाव लिएर र उनीहरूको भावना बुझेर काम गर्ने प्रतिबद्धता जनाएका छन् ।

रोजगारीको लागि साउदी अरबमा रहेका नेपाली युवा जीपी आचार्यले प्रधानमन्त्रीलाई लेखेको खुल्ला पत्रको जवाफमा ओलीले देशमा नै रोजगारी सिर्जना र उद्यमशीलता बढाउने काममा आफूहरू लागिरहेको उल्लेख गरेका छन् । ‘तपाईँजस्तै युवासँग सुझाव लिएर, उहाँहरूको भावना बुझेर काम गर्न चाहन्छु’, ओलीले लेखेका छन् ।

आइतबार साँझ सामाजिक सञ्जाल फेसबुक मार्फत ओलीले उद्यमशीलताको आधार तयार गर्न आफूहरू लागिरहेको भए पनि एकै पटक सोचे जस्तो काम गर्न नसकिएको उल्लेख गरेका छन् । यसमा आफूले कसैलाई पनि दोष नदिने प्रधानमन्त्रीले स्पष्ट पारेका छन् ।

‘सबैका समस्या सुन्छु, एकै पटक गर्न नसकिएला, तर हामी आफ्ना पाइलालाई त्यसतर्फ नै चालिरहेका छौँ’, प्रधानमन्त्रीले उल्लेख गरेका छन्।

आचार्यले लेखेको पत्र हजारौँ नेपाली युवाको प्रतिनिधित्व गर्ने पत्र भएको उनले बताएका छन् । ‘तपाईँले चिठ्ठीमा लेख्नु भएका कुरा तपाईका मात्रै होइनन्, हजारौँ युवाहरूका प्रतिनिधि समस्या हुन्, यहाँ केही गर्न खोज्दा नसकेर धेरै युवा देश बाहिर हुनुहुन्छ, हामी यहीँ रोजगारी सिर्जना गर्ने, यहीँ उद्यमशीलता बढाउने र आफ्नै देशमा दुःख गरेर खुसीसाथ परिवारसँग बस्ने वातावरण बनाउन खोजिरहेका छौँ, यसका लागि विगतमा पनि काम गर्‍यौँ, हामीले जति गर्नु पर्ने थियो, त्यति गर्न सकेनौँ, केही पनि काम नभएको होइन, हुनुपर्ने जति भएन, यसका लागि म अरूलाई दोष दिन्नँ, पहिले यहीँ रोजगारी सिर्जना गर्न, यहीँ उद्यमशीलता बनाउन आधार खडा गरौँ भनेर लागिरहेका छौँ’, ओलीले  लखेका छन् ।

यस्ता खालका स्वच्छ आलोचना र सुझावले काम गर्न बाटो देखाउने भन्दै उनले आचार्यलाई धन्यवाद समेत दिएका छन्  । ‘तपाईँको परिवारजन र बालबच्चामा मेरो स्नेह छ, माया छ, तपाईँले गर्नु भएको परिश्रम र मेहनतलाई मेरो सम्मान छ’, उनले लेखेका छन् ।

ओली प्रधानमन्त्री भएपछि आचार्यले सामाजिक सञ्जाल फेसबुकमार्फत एक पत्र लेख्दै देशमा नै केही गर्न पाउनु पर्ने माग राखेका थिए । नेपालीले अझै कहिलेसम्म मरुभूमिमा पसिना बगाउनु पर्ने हो ? भन्दै उनले प्रधानमन्त्रीलाई प्रश्न गरेका थिए । ‘हामीले पनि पार्टीको लागि दिन रात नभनी संघर्ष गरेको के यही दिन, यही अवस्था देख्नलाई हो रु गम्भीर भएर सोच्ने बेला आएको छ’,  आचार्यले लेखेका छन् ।

यस्ताे आलीको जवाफ