काठमाडौं – निर्वासनमा रहेका हङकङका दुई जना अभियानकर्मीको पेन्सन रोक्का भएको पाइएको छ । हाल अस्ट्रेलियामा निर्वासनमा रहेको हङकङका दुई अभियन्ताहरुको पेन्सनसँगै अन्य सम्पत्ति समेत रोक्का भएको बेलायतको द गार्जियन अखबारले जनाएको छ ।

यसअघि बेलायतको एचएसबीसी बैंकले सन् २०२० मा हङकङबाट भागेर अस्ट्रेलिया पुगेका लोकतन्त्रवादी अभियन्ता टेड हुईको सम्पत्ति रोक्का गरिदिएको थियो ।

पछिल्लो समय भने उनले पाउँदै आएको पेन्सन पनि रोक्का भएको हो । एचएसबीसी बैंकमा उनको लाखौँ हङकङ डलर बराबरको पेन्सन बचत रहेको उनको भनाइ छ ।

त्यसैगरी, नाम उल्लेख गर्न नचाहने अर्का लोकतन्त्रवादी अभियन्ताले पनि यस्तै समस्या झेल्नुपरेको द गार्जियनले उल्लेख गरेको छ । क्यानाडाको वित्तीय सेवा प्रदान गर्ने कम्पनी मानुलाइफले व्यवस्थापन गर्दै आएको पेन्सन बचतको ६ लाख डलर आफूले झिक्न नपाएको उनको भनाइ छ ।