इलाम–इलाम क्षेत्र नम्बर २ को उपनिर्वाचनलाई प्रतिष्ठाको विषय बनाएको राष्ट्रिय स्वतन्त्र पार्टी सुरुवाती रुझानमा ठूला दुई दलभन्दा निक्कै पछि परेको छ ।

सभापति रवि लामिछानेसहितका नेताहरू पटक पटक पुगेर आक्रमक चुनावी प्रचार गर्दा पनि फाकफोकथुमका ३ वटा वडाको परिणाम आइसक्दा रास्वपालाई स्वतन्त्र उम्मेदवारले पछि पारेका छन् ।

फाकफोकथुम गाउँपालिका १, २ र ३ नम्बर वडाको मत गनिसक्दा नेपाली कांग्रेसका डम्बर खड्काले अग्रता बनाइरहँदा रास्वपा उम्मेदवार मिलन लिम्बू चौथो स्थानमा खुम्चिएका छन् । यद्यपि यो सुरुवाती रुझान मात्रै हो, इलाम सदरमुकामतिर प्रवेश गरेसँगै रास्वपाले मत बढाउने सम्भावना कायमै छ ।

पछिल्लो परिणामअनुसार कांग्रेसका खड्का र एमालेका सुहाङ नेम्बाङबीच कडा प्रतिस्पर्धा चलिरहेको छ ।

फाकफोकथुम १, २, ३ वडा जम्मा ४१८१ मत गन्दा कांग्रेसका खड्का ४२ मतले अगाडि छन् । यहाँ उनले १६ सय ४३ मत ल्याउँदा एमालेका सुहाङले १६०१ मत ल्याएका छन् ।

तेस्रो स्थानमा मुढा लिएर उठेका स्वतन्त्र उम्मेदवार डकेन्द्र थेगिम छन् । उनले ४३७ मत ल्याउँदै तेस्रोमा छन् । उता रास्वपाका लिम्बुलाई ३०५ मत झरेको छ ।

धरानका मेयर हर्क साम्पाङसहितले साथ दिएका थेगिम तेस्रो हुँदा रास्वपालाई चौथो मत मिलेको हो । यहाँ थेगिमले रास्वपाका लिम्बुलाई ताजा अवस्थामा १३२ मतले पछि पारेका छन् ।