काठमाडौं– इलाम क्षेत्र नम्बर २ को मतगणनामा नेपाली कांग्रेस र नेकपा एमालेबीच पहिलो स्थानका लागि प्रतिस्पर्धा चलिरहेको छ ।

फाकफोकथुम गाउँपालिका वडा नम्बर १ र २ को परिणाम आउँदा कांग्रेस उम्मेदवार डम्बर खड्का पहिलो र नेकपा एमालेका सुहाङ नेम्वाङ दोस्रो स्थानमा छन् ।

तर यहाँको निर्वाचन परिणामले माधवकुमार नेपाल नेतृत्वको नेकपा एकीकृत समाजवादीको अवस्था कमजोर देखाएको छ । दुईवटा वडाको परिणाम आउँदा समाजवादीका उम्मेदवार जितबहादुर राईले केबल ६ मत पाएका छन् ।

फाकफोकथुम १ र २ वडाको मत गन्दा उनलाई वडा नम्बर २ बाट ६ मत झरेको छ । वडा नम्बर १ बाट उनलाई १ मत पनि झरेन ।

एकीकृत समाजवादीका जितबहादुर ७४ को स्थानीय तहको निर्वाचनमा इलामको माईजोगमाई गाउँपालिका अध्यक्षमा निर्वाचित भएका थिए । त्यसबेला उनी एमालेबाट उठेका थिए । २०७९ मा भने उनी पराजित भए ।

इलाम एकीकृत समाजवादीका सम्मानित नेता झालनाथ खनालको गृह जिल्ला पनि हो । खनालले आफू नउठेर राईलाई उम्मेदवार बनाएका हुन् ।

यहाँ अहिलेसम्म १८ सय ३६ मत गन्दा ३० मत बदर भएको निर्वाचन कार्यालयले जारी गरेको पत्रमा उल्लेख छ ।