इलाम- प्रतिनिधिसभाको उपचुनावको मतगणना फाकफोकथुम गाउँपालिकाको वडा नम्बर–१ बाट सुरु भएको छ । विगतको चुनावी परिणााम हेर्दा करिब १६ हजार मतदाता रहेको फाकफोकथुममा कांग्रेस र एमाले दुबै दल समानान्तर शक्तिका रुपमा देखिएका थिए ।

कुल १६ हजार मतदतामध्ये गत स्थानीय चुनावमा फाकफोकथुममा ११ हजार मत खसेको थियो । अहिले पनि यो पालिकामा करिब १० हजारको हाराहारीमै मत खसेको छ ।

गत स्थानीय चुनावमा फाकफोकथुमबाट एमालेका दीपेन्द्र खनालले ५३२२ मत पाएर पालिका अध्यक्षमा जितेका थिए भने प्रतिद्वन्द्वी कांग्रेसका डिकबहादुर थापाले ४८२१ मत पाएका थिए । अध्यक्षमा कांग्रेसको भन्दा एमालेको ५०१ मत बढी देखिएको थियो ।

तर, वडातर्फ हेर्ने हो भने कुल ७ वटा वडा रहेको फाकफोकथुममा एमालेले तीनवटा वडामात्रै जितेको थियो भने कांग्रेसले चारवटा वडा जितेको थियो ।

कांग्रेसले वडा नम्बर १,२,४ र ७ मा  थियो भने वडा नम्बर ३, ५, ६ मा एमालेले जितेको थियो ।

यहाँ पालिका अध्यक्षमा मंगोल नेशनल अर्गनाइजेनले १८० भोट ल्याएको थियो भने जसपाका उम्मेदवारले ६३ मत ल्याएका थिए ।

प्रतिनिधिसभाको चुनावमा भने यहाँबाट कांग्रेसका डम्बर खड्काको भन्दा सुवास नेम्वाङको पक्षमा बढी मत खसेको थियो ।

स्थानीय चुनावको पुरानो अंकगणितकै आधारमा यसपालि पनि कांग्रेस र एमालेकै वीचमा मत बाँडिन्छ या घण्टी र मुढामा पनि ‘भोट ट्रान्सफर’ हुन्छ ? यो रुझान हेरेर अन्य पालिकाको पनि ‘ट्रेन्ड एनालाइसिस’ गर्न सकिने छ ।

फाकफोकथुमको वडा नम्बर १ यसअघि कांग्रेसले जितेको ठाउँ हो । कांग्रेसले यहाँ ८०४ मत ल्याउँदा एमालेले ४७७ मत पाएको थियो । माओवादीसँग यो वडामा २५५ मत थियो ।