काठमाडौँ– नेपाली कांग्रेसको ‘समुदायमा कांग्रेस अभियान हिजोबाट सुरु भएको छ । हरेक जिल्लाका टोल टोलमा गरिने अभियानका लागि केन्द्रीय नेताहरूलाई खटाइएको छ ।

कांग्रेसले फरक फरक जिल्लामा फरक फरक समुदायका बीच पुग्न र संवाद गर्न केन्द्रीय टोली खटाएको हो । टोलीमा केन्द्रीय नेतृत्व सँगसँगै प्रदेशले तोकेका पदाधिकारीहरू सरिक रहने छन् ।

अभियानअन्तर्गत डा. शेखर कोइराला झापा र सुनसरी), डा नारायण खड्का संखुवासभा, भोजपुर, तेह्रथुम र धनकुटा, बलबहादुर केसीलाई मोरङ, ताप्लेजुङ, पाँचथर, इलाम, ओखलढुंगा र उदयपुर तोकिएको छ ।

यस्तै, कांग्रेसले प्रकाशमान सिंहलाई मधेश प्रदेशका महोत्तरी, सिराहा, सप्तरी, धनुषा तथा बागमतीको सिन्धुली र मकवानपुरमा खटाएको छ । यसैगरी, महालक्ष्मी उपाध्याय ‘डिना’लाई बारा, पर्सा, रौतहट, सर्लाही, धादिङ र चितवनमा पठाएको छ ।

कांग्रेसले डा मिनेन्द्र रिजाललाई काठमाडौँ, काभ्रे, सिन्धुपाल्चोक, नुवाकोट र रसुवा, पुष्पा भुसाललाई ललितपुर, भक्तपुर, रामेछाप र दोलखा पठाएको छ ।
यसैगरी महेन्द्र यादवले तनहुँ, लमजुङ, गोर्खा, पर्वत र नवलपुरको नेतृत्व गर्नेछन् भने प्रदीप पौडेल कास्की, स्याङ्जा, म्याग्दी र बागलुङ पुग्ने छन् ।

नेता विमलेन्द्र निधि रूपन्देही, अर्घाखाँची, दाङ, पाल्पा, बाँके र रोल्पा पुग्दा डा. डिला संग्रौला कपिलवस्तु, पाल्पा, गुल्मी, रुकुम (पूर्व), बर्दिया, प्युठान र नवलपरासी जानेछन् ।
यसैगरी डा. शशांक कोइरालालाई दैलेख, सल्यान र सुर्खेत पठाइएको छ भने भिष्मराज आङ्देम्बेले कैलाली, डोटी, अछाम, बझाङ, डडेल्धुरा, दार्चुला, बैतडी र कंचनपुरको नेतृत्व गर्नेछन् ।

तोकिएका जिल्लाहरुमा भिन्नभिन्न समुदायका बीचमा भ्रमण, भेटघाट र छलफलको संयोजन पार्टी जिल्ला कार्यसमितिले गर्नेछ । टोली पुस २६ गते सुशील कोइराला स्मृति दिवससम्म जिल्लामा रहनेछ ।