काठमाडौं – पाकिस्तानमा खाना पकाउने ग्यासको मूल्य ह्वात्तै बढ्ने देखिएको छ । पाकिस्तानको तेल तथा ग्यास नियामक प्राधिकरणले ग्यासको मूल्य बढाउने तयारी गरेको हो ।

एआरवाई न्युजका अनुसार प्राधिकरणले मूल्य बढाउने निर्णय संघीय सरकारसमक्ष पठाइसकेको छ । अब सरकारले स्वीकृत गर्नेबित्तिकै मूल्य बढ्ने छ ।

प्राधिकरणले औसतमा सिन्ध र बलोचिस्तान प्रान्तमा २५.७८ प्रतिशत र इस्लामावाद, पञ्जाब र खैबर पख्तुनख्वा प्रान्तमा औसतमा ८.७१ प्रतिशतले मूल्य बढाउने तयारी गरेको छ । पाकिस्तानमा सञ्चालित ग्यास वितरण गर्ने कम्पनीहरुले बढिमा २ सय प्रतिशतभन्दा धेरै मूल्य बढाउने प्रस्ताव गरेका थिए । यद्यपि प्राधिकरणले भने त्यसो गर्न नमानेको समाचारमा जनाइएको छ ।

उच्च मुद्रास्फीतिसँगै ग्यासको भाउ बढाउन ग्यास कम्पनीमाथि तीव्र वित्तीय दबाब छ । पाकिस्तानमा हाल खाना पकाउने ग्यासको आपूर्ति अपर्याप्त रहेको जनाइएको छ ।