काठमाडौं- कजाकस्तानमा भएको घातक हवाई दुर्घटनामा रूसको हात रहेको जनाइएको छ ।

अजरबैजानको प्रारम्भिक अनुसन्धानले रुसको वायु रक्षा प्रणालीले विमान खसालेको निष्कर्ष निकालेको अन्तराष्ट्रिय सञ्चारमाध्यमले दाबी गरेका छन ।

अजरबैजान एयरलाइन्सको फ्लाइट ८४३२ बुधबार दक्षिणी रुसको चेचन्या क्षेत्रको राजधानी ग्रोज्नी जाँदै गरेका बेला अक्ताउ सहरनजिकै दुर्घटना हुँदा ३८ जनाको मृत्यु भएको छ । यो दुर्घटनामा २९ जना घाइते भएका छन् ।

यद्यपि, अजरबैजानले यस प्रकरणको अनुसन्धानको निष्कर्ष सार्वजनिक रूपमा घोषणा गरिनसकेको

‘कि रूसी एन्टी एयरक्राफ्ट मिसाइल दोषी थियो,’ युरोन्युज, द वाल स्ट्रीट जर्नल, अनाडोलु एजेन्सी र रोयटर्स समाचार एजेन्सीलगायतले स्रोत उल्लेख गर्दै लेखेका छन् ।

उनीहरूले यो विमान खस्नुमा रूसको हात रहेको जिकिरसहित अजरवैजानले पनि त्यसलाई पुष्टि गरेको उल्लेख गरेका छन् ।

‘जहाजलाई रूसी प्यान्टसिर एस ब्याट्रीले प्रहार गरेको थियो, यसको सञ्चार इलेक्ट्रोनिक युद्ध प्रणालीले हमला गरेको थियो,’ प्रारम्भिक रिपोर्टमा भनिएको छ, ‘सुरुमा जहाजलाई मिसाइल हानिएको हो भन्ने विश्वास गरिएको थिएन ।’

यद्यपि, यसमा थप र विस्तृत छानबिन गरेपछि अजरबैजानले आफ्नो पहिलो रिपोर्ट चाँडै सार्वजनिक गर्ने जनाएको छ ।

तर, रूसले भने यसमा कुनै प्रतिक्रिया दिएको छैन । तर, रूसका केही अधिकारीले यस आरोपको खण्डन गरेका छन् ।