पोखरा- पोखरा महानगरपालिका वडा नं. ४ गैरापाटनस्थित प्राइम बहुउद्देश्यीय सहकारी संस्था लिमिटेडको रकम हिनामिना प्रकरणमा पक्राउ परेका एकजना जेल चलान भएका छन् ।

प्रहरीले शनिबार पक्राउ गरेर अदालतमा पेश गर्दा धरौटी बुझाउन नसकेपछि तनहुँको व्यास नगरपालिका वडा नं. १० का ५६ वर्षीय शंकर नारायण श्रेष्ठ जेल चलान भएका हुन् ।

उनीसँग जिल्ला अदालत कास्कीले ५० लाख रुपैयाँ धरौटी माग गरेको थियो । तर धरौटी बुझाउन नसकेपछि श्रेष्ठ कारागार चलान भएको कास्की प्रहरीका सूचना अधिकारी एवम् डीएसपी वसन्तकुमार शर्माले बताए ।

पोखराको प्राइम सहकारी ठगी प्रकरणमा ६६ जनाविरुद्ध जिल्ला अदालत कास्कीमा मुद्दा चलेको छ। एक अर्ब ५७ करोड १५ लाख आठ हजार एक सय २४ रुपैयाँ बिगो मागदाबीसहित जिल्ला सहकारी वकिलको कार्यालयले अभियोगपत्र दर्ता गरिसकेको छ ।